DIE STERRETOEKOMS

 - wat wag vir God se kinders!

 [Ons lees saam uit God se Woord - Daniël 12:1-3] 

Die Bybel is ‘n boek van sterk teenoorgesteldes en kontraste. Een deurlopende algemene kontras is die verskil tussen regverdiges en die onregverdiges, die wat God gehoorsaam en die wat God nie gehoorsaam nie, diegene wat IN Jesus is en diegene wat BUITE Jesus is! God maak onderskeid tussen mense! Baie algemeen hoor mens as iemand tot sterwe kom : “Hy/sy is nou op ‘n beter plek.” Dis baie waar dat God se kinders wat gesterf het, reeds op ‘n beter plek is, maar dis nie waar van alle mense nie.

God is nie maar OK met alle mense nie. Kom ons blaai so bietjie deur die Bybelse geskiedenis : Kain en Abel (een se offer word verwerp, die ander een s'n aangeneem), Noag en sy familie word gered teenoor die res van die mensdom wat verdrink, die Israeliete in Egipte wat die Paaslam geslag het teenoor die Egiptenare wat nie 'n paaslam geslag het nie,

In die Nuwe Testament word die skeiding al hoe duideliker -  reeds by Jesus se geboorte word die skeiding duidelik – Herodes wil Jesus doodmaak, die herders en wyse manne bring eer aan Hom. Opvallend in die Nuwe Testament is dat baie mense wat godsdienstig was en die Bybel (OT Geskrifte) geken het, Jesus verwerp het, maar dat sondaars en gebroke mense Jesus se boodskap van bekering en vergifnis aangegryp het – Saggeus en Levi – skelm tollenaars, die gebroke Samaritaanse vrou word volgelinge van Jesus. Johannes berei ons in sy evangelie voor vir hierdie skeidng en onderskeid:

Die boek Openbaring is natuurlik ook vol van hierdie kontraste – die prostituut Babilon wat geoordeel word, en die bruid , die nuwe Jerusalem wat gered word. Die onreines en leuenaars moet buite die heerlike stad bly en net diegene met wit klere wat gewas is in die bloed van die Lam mag binnegaan.  Jesus waarsku in  Matteus 25 oor die finale oordeel  en beskryf dit i.t.v. die skeiding tussen die skape en die bokke. En dan verwys Jesus spesifiek na die woorde van Daniël 12 in ons gelese gedeelte. “Hierdie mense (onregverdiges) sal weggaan na die ewige straf, maar die regverdiges na die ewige lewe.” (Matteus 25:46) Die volmaak liefdevolle Jesus het nooit gesê alle mense sal eendag op ‘n beter plek wees nie!

Terug by Daniël... Jesus het die boek Daniel baie goed geken. Net so terloops – Jesus se titel wat Hy vir Homself gebruik het “Seun van die mens” kom ook uit Daniel (hoofstuk 7) Kom ons gaan net so kortliks deur hierdie drie verse. 

Daniël 12:1-3

1“ ‘ En in dié tyd sal Migael opstaan,

die groot vors, wat die mense

van jou volk bystaan.

Dit sal 'n tyd van verdrukking wees,

soos daar nog nie was

sedert 'n nasie ontstaan het,

en tot in hierdie tyd nie.

Maar in hierdie tyd

sal jou volk gered word,

elkeen wie se naam

gevind word waar dit

in die boekrol opgeskryf is.

2 Baie van hulle wat slaap

in die stof van die aarde,

sal wakker word –

sommige vir die ewige lewe,

en ander tot skande, tot ewige afsku.

3 Die verstandiges sal skyn

soos die glans van die hemelkoepel,

en hulle wat baie gelei het

tot regverdige optrede,

sal skyn soos die sterre –

vir altyd en altyd.

Vers 1 “In dié tyd” verwys na die konflik in die vorige hoofstuk.  Dis die tyd van verdrukking, geweld, martelaarskap. Dis ook die tyd waarin baie van God se mense afvallig sal word. Maar diegene wat waarlik vir God ken sal weerstand bied teen die misleiding en versoekings. Aan die einde van hierdie tyd van verdrukking sal God uitkoms bring. Ons lees van Migael wat ‘n rol sal speel. Migael is die aartsengel wat teen die bose oorlog voer (Openbaring 12:7) Sy taak is die beskerming van God se mense. Die finale verlossing van God se kinders is verseker – elkeen wie se naam in die boekrol opgeskryf is –  die boek van die lewe waarvan ons in Openbaring lees.

Vers 2. Dis na hierdie vers wat Jesus verwys in sy beskrywing van die oordeel (tussen die skape en die bokke)  Kom ons kyk mooi hierna :

In die konflik  wat die finale oordeel voorafgaan (dis nou in hierdie tyd waarin ek en jy ook leef...) sterf beide Godvresendes en goddeloses. Opmerklik. Hulle “slaap”. Dis ‘n metafoor vir die dood en suggereer dat die dood hier op aarde net ‘n tydelike situasie is.  AL die dooies sal opstaan -  Vanuit die Nuwe Testament weet ons Daniëll verwys na die algemene opstanding voor die finale oordeel. “Baie” het hier die betekenis van almal. In die Nuwe Testament leer ons duidelik alle mense van alle tye sal uit die grafte opstaan om geoordeel te word.

Almal wat uit die dood sal opstaan gaan egter nie na dieselfde bestemming nie.  Daar is twee absoluut kontrasterende en uiteenlopende bestemmings vir die mens in die lewe hierna. 

EWIGE LEWE en EWIGE AFGRYSLIKE SKANDE! 

Dis ‘n basiese Bybelse lering – ons vind dit beide in die Ou en die Nuwe Testament. Ons vind dit voor Jesus (soos hier) en na Jesus se koms – Hy leer dit op baie plekke. Die tragedie is dat die algemene publiek, en ook baie kerkmense nie meer hierdie waarheid van die oordeel en skeiding glo nie! En daarom word daar so ligtelik van almal wat sterf gesê – “HY/SY is nou op ‘n beter plek”

Vers 3 Dis opvallend dat Daniel nie verder uitbrei oor die ellende van die goddeloses nie, maar wel die heerlikheid van die verstandiges beklemtoon.  Die verstandiges is diegene wat insig het in God se wil. Die verstandiges (in Nuwe Testamentiese konteks) is diegene wat aan Jesus behoort. Die verstandiges is die wat gereed is om die Bruidegom Jesus te ontmoet (Dink sommer aan die Gelykenis van die tien meisies) 

Vir die getroues wag 'n heerlike toekoms! Daniël vergelyk die heerlikheid wat vir God se kinders wag met die sterreglans van die hemelkoepel. Skitterend, helder en heerlik!

Opmerklik - Die verstandiges hou nie die waarheid vir hulleself nie, maar deel dit met ander. Hulle lei ander om die regte dinge te doen. Geliefde, hoe klink jou woorde en hoe lyk jou voorbeeld – spoor dit ander mense aan om Jesus te volg en Hom te gehoorsaam deur regverdige dade te doen?

 DIE GROOT BOODSKAP

Wat is die hoof boodskap vir ons? Daniel (net soos die boek Openbaring) is in hoofsaak ‘n boodskap van troos en aanmoediging vir God se kinders om te volhard in moeilike tye! Dis om vir jou wat volhard te bemoedig en te sê – moenie moed verloor nie, daar wag vir jou ‘n ewige sterretoekoms in die teenwoordigheid van God. JUIG! 

Tog is hier ook ‘n duidelike boodskap vir die onbekeerdes, die Here waarsku jou om jou nog ‘n kans te gee. Gebruik dit anders wag daar vir jou ‘n afgryslike einde. Amen.

LUISTER GERUS BY STERREHEMEL 

op YouTube.

 

JESUS SE OPSTANDINGSHEERLIKHEID

Is ons troos, maar rig ook ‘n vraag aan elkeen… 

"Toe sê Jesus vir haar: "Ek is die opstanding en die lewe. Wie in My glo, sal lewe, al sterwe hy ook; en elkeen wat lewe en in My glo, sal in alle ewigheid nooit sterwe nie. Glo jy dit?" Johannes 11:25-26 

Die dood is soos ‘n swart kol op die wit papier van ons bestaan. Ons kan dit nie uitvee of wegwens nie. Dis die groot verskrikking, skeiding en smart. Dis onvermydelik, daar is geen menslike oplossing of kuur nie. 

En tog.... Jesus in sy heerlikheid het wel ‘n antwoord vir die dood. Die klimaks van Jesus se heerlikheid is juis Sy opstandingsheerlikheid! Hy het die groot vyand van die dood verslaan. Hier in Johannes 11 lees ons hoe hy Lasarus uit die dood opgewek het, maar meer nog Hyself is die opstanding en die lewe. Daar bestaan nie lewe en opstanding buite Hom nie. Hy het later self uit die graf opgestaan en vir altyd die donker kettings van die dood afgeskud! En so vir al sy kinders ‘n nuwe heerlike bestaan geopen! Die Heilige Gees gee deur die Woord sekerheid in ons harte dat Jesus waarlik opgestaan het! 

Die opstanding is die fondasie waarop ons geloof rus! Vir die eerste dissipels was die opstanding van Jesus die klimaks wonderwerk, die “gamechanger”...Onthou hulle het met hulle eie oë gesien Jesus sterf... 

Almal het geweet Jesus was dood; van die goewerneur tot die soldate wat Hom tereggestel het tot die vroue wat Hom begrawe het tot sy teenstanders wat ’n sameswering rondom ’n opstandings gerug gevrees het. Hulle het almal geweet Hy was dood. Geen twyfel daaroor nie. Dit is waarom die storie wat opgedis is om die leë graf te verklaar, nie beweer het dat Hy nie regtig dood was nie, maar dat sy dissipels die liggaam gesteel het. Maar hierdie plan het nie gewerk nie. Die dissipels was so oortuig van die opstanding dat hulle bereid was om hulle lewens daarvoor te verloor (Mense sal eerder lieg om hulle lewens te beskerm, nooit om hulle lewens te verloor nie!) Hulle het dus duidelik geweet hulle het nie die lyk gesteel nie!

Hoe het hulle oortuig geword? Vir veertig dae het Jesus aan enkelinge sowel as groepe verskyn, sommige so groot as 500. (1 Korintiërs 15:6) Die meeste van hierdie persone was nie liggelowig nie, maar taai om oortuig te word. Soos Thomas... Die evangelies is baie eerlik... Toe die skeptiese dissipels begin besef dat die opstanding dalk waar sou kon wees, het hulle eers gespekuleer dat die Jesus wat hulle gesien het dalk ’n spook was. Jesus het korte mette met hierdie spekulasie gemaak en dit konkreet uit die weg geruim. So het Hy vir die twyfelende Tomas gesê : “Bring jou vinger hier en kyk na My hande; en bring jou hand en steek hom in My sy.” By ’n ander geleentheid het Jesus voor die verbaasde dissipels daarop aangedring om ’n stuk vis te eet om aan hulle te wys dat Hy nie ’n gees was nie. (Lukas 24:39-43) Geen twyfel oor die leë graf en die opstanding nie! 

Jesus se liggaam was beslis nie meer in die graf nie, want dan sou die vyand maar slegs Jesus se oorskot te voorskyn moes bring om die hele Christelike beweging stop te sit. Die graf was leeg. Jesus het liggaamlik opgestaan. (Nie net in mense se harte soos dikwels beweer word nie) Jesus se opstandingsliggaam was egter meer as net ’n sterflike liggaam wat weer lewendig geword het. Dit was dieselfde en tog ook nie dieselfde nie. Hy kon herken word, as die een wat Hy altyd was. Sy liggaam was ’n fisiese liggaam. Maar dit was ook ’n getransformeerde verheerlikte liggaam. Wanneer die apostel Paulus die toekomstige opstandingsliggaam van Christene beskryf, geld dit ook vir Jesus se liggaam, omdat Christus opgewek is as die “eersteling” van die res van die dooies wat aan Hom behoort. (1 Korintiërs 15:20) Met ander woorde die liggaam van die opgestane Christus is deel van dieselfde oes van al die ander liggame wat Hy sal opwek in heerlikheid op die laaste dag. Christus. Ons kry ‘n belangrike leidraad in Filippense 3:21. “Deur die krag waarmee Hy alles aan Homself onderwerp, sal Hy ons nederige liggame verander om soos sy verheerlikte liggaam te wees.” Dis dieselfde en tog op ’n heerlike manier baie beter. ‘n Liggaam sonder enige beperkings! 

Die opstanding van Jesus bevry ons van vrees en gee vir ons hoop en blydskap. Dis ook die troos wat ons het by die afskeid van ‘n geliefde wat aan Jesus behoort! Onthou Jesus self is die opstanding en die lewe, buite Hom is daar geen opstanding en geen lewe nie! Het jy al die opgestane Jesus vertrou as jou Verlosser? As Jesus hier vir Marta vra : “Glo jy dit?”, dan vra Hy nie net of sy glo dat Hy Lasarus uit die dood kan opwek nie, Hy vra haar :”Glo jy in My as die Enigste Een wat ewige lewe en volkome nuutmaking gee?” Hierdie selfde vraag kom vandag ook nou na jou...

TWEE MANIERE VAN STERWE

Ons hou ‘n diens omdat ons graag wil hê dat die Woord vir ons lig moet gee op die werklikheid van die dood. Dis ‘n werklikheid wat ons nou vandag weer opnuut in die gesig staar met die afsterwe van...

Die Woord troos ons.

Die Woord waarsku ons ook. 

Die Woord nooi ons ook om betyds gereed te maak vir ons laaste afspraak. 

Almal moet sterwe en daar is net twee maniere van sterwe. Dis twee radikaal verskillende maniere met twee radikaal uiteenlopende gevolge en eindbestemmings. 

Die twee opsies is : “in julle sondes sterwe” of “in die Here sterwe”

OPSIE 1 In Johannes 8:24 lees ons hoe Jesus vir die Jode sê : “Daarom het Ek vir julle gesê julle sal in julle sondes sterwe, want as julle nie glo dat Ek is wat Ek is nie, sal julle in julle sondes sterwe."

Natuurlik word ons almal gebore in sonde. Dis ‘n gegewe. Ons is inherent sondaars en ons doen sonde juis omdat ons sondaars is. Ons kan dit nie ontken nie. Ons hoef egter nie in ons sonde te sterwe nie. God het juis vir ons ‘n Verlosser gestuur. Jesus Christus wat aan die kruis sonde, Satan, dood en hel oorwin het. Hoe het Hy dit gedoen? Hy het ons sonde op Hom gevat... die volle straf van God gedra in ons plek. So kan elkeen wat Hom aanvaar het deur die geloof, weet : “My skuld is betaal, my straf is reeds namens my uitgedien, ek is vry, ek het vrede!” (Jesaja 53:5,6)

As ek Jesus egter verwerp, m.a.w. Hom nie doelbewus aanvaar nie (soos wat hierdie Jode gedoen het), bly ek in my sonde en bly God se oordeel op my tot in ewigheid. Dis hulle van wie Paulus in 2 Tessalonisense 1:8,9 praat : "Dan sal Hy die mense straf wat nie vir God ken nie en dié wat die evangelie van ons Here Jesus nie gehoorsaam nie. Die ewige verdoemenis sal hulle straf wees, altyd geban uit die teenwoordigheid van die Here en van sy wonderbaarlike mag."

Dis my plig (al voel dit vir jou dalk ongemaklik) om jou te vra : “Wat het jy met Jesus gemaak? Het jy Hom tot op vandag verwerp of het jy Hom heelhartig aanvaar?”

Dis gelukkig ook my heerlike voorreg om aan elkeen te verkondig dat daar lewe is in Jesus, ewige lewe! Dit bring ons by die volgende...

OPSIE 2 In Openbaring 14:13 lees ons : Toe het ek ‘n stem uit die hemel hoor sê: "Skryf op! Geseënd is dié wat van nou af in die Here sterwe." "Ja," sê die Gees, "hulle sal rus van hulle arbeid, want alles wat hulle gedoen het, volg hulle."

As mens aan Jesus behoort dan is die dood nie meer ‘n verskrikking nie. Om aan Jesus te behoort beteken dat al my sondes my vergewe is, dat ek vrygespreek is, dat ek ‘n erfgenaam van die ewige erfenis geword het.

Dis opvallend dat hier gepraat word van arbeid/werke. Hoekom? Diegene wat deur Jesus gered is se lewe bring goeie werke voort! As Jesus my Verlosser is, word dit sigbaar in ‘n nuwe lewe – van vergifnis vir ander, van heiligheid, van aanbidding van die Here, liefde vir God, liefde vir my medemens... Goeie werke red ons nie, maar goeie werke is ‘n noodwendige gevolg van redding deur die geloof in Jesus. Hieroor is Efesiërs 2:8-10 baie duidelik :

“Julle is inderdaad uit genade gered, deur geloof. Hierdie redding kom nie uit julleself nie; dit is ‘n gawe van God. Dit kom nie deur julle eie verdienste nie, en daarom het niemand enige rede om op homself trots te wees nie. Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het.”

Die troosboodskap van die Woord is baie helder : Vir diegene wat in die Here sterwe is hulle sterwe net ‘n deurgangsroete na ewige heerlikheid. Ewige rus, wat beteken ewige vervulling! Hulle goeie werke sal tot in alle ewigheid beloon word. Hulle lewens was die moeite werd omdat die genade van God in Jesus die groot verskil maak! Daarvoor kan ons God maar net tot in alle ewigheid dank. Amen.

JA, DAAR IS 'N HIERNAMAALS

- want God is almagtig en Sy Woord is waar! 

[lees Markus 12:18-27]

Mense spot deesdae baie graag met die hiernamaals, dis amper asof sommige ‘n lewe anderkant die graf minag. “Ag, glo jy regtig in ‘n pie in the sky when you die?”, koggel hulle. By ander mense hoor mens amper ‘n fatalistiese houding :”Jong, ons moet maar net nou vir mekaar goed wees, laat ons maar nou ‘n dop saam drink, daar is nie ‘n eendag nie, daar is nie ‘n ewigheid nie! Kyk maar wat jy uit die lewe kan kry en vergeet van ‘n lewe na die dood.” Dis die tipe van houding waarna Paulus verwys : “Laat ons eet en drink, want môre sterf ons!” 

Natuurlik is dit inderdaad ‘n Bybelse boodskap dat hierdie lewe belangrik is, dat ons nou ten volle moet leef, dat ons nou moet liefde bewys, nou iets moet doen aan armes en hongeriges... Goeie werke is immers iets wat nou op hierdie aarde gedoen moet word! Maar spesifiek op 'n dag soos vandag moet ons nooit vergeet dat die heerlike opstanding uit die dood nog altyd deel was van die kern van die Christelike boodskap van hoop nie. DAAR IS 'N OPSTANDING UIT DIE DOOD!  As jy die opstanding wegvat, vat jy die hart van die evangelie weg en bly daar niks evangelie oor nie! Hieroor is die apostel baie duidelik : “As ons net vir hierdie lewe ons hoop op Christus vestig, is ons die bejammerenswaardigste van alle mense.” (1 Kor. 15:19)

‘n Spottery met die hiernamaals en met die opstanding is eintlik ‘n aanval op die almag van God en die evangelie van Jesus Christus. 

Sulke aanvalle is ook niks nuuts nie. Dis presies wat die Sadduseërs doen in Markus 12. Die Sadduseërs was destyds een van die twee hoof Joodse groeperinge (die ander groep was die Fariseërs). Hulle het net die eerste vyf boeke van Moses as bron van gesag erken en volgens hulle het daar niks gestaan van ‘n opstanding nie en het hulle nie aan ‘n opstanding en ook nie aan engele geglo nie. Die Sadduseërs kom nou met ‘n strikvraag na Jesus toe en dink hulle gaan hom uitboul en in die verleentheid stel. Die agtergrond van hulle vraag is die Mosaïese bepaling oor die leviraatshuwelik. Dit was ‘n wet wat voorsiening gemaak het dat ‘n man ‘n verantwoordelikheid het as sy broer kinderloos sou sterwe om met die gestorwe broer se vrou te trou en so ‘n nageslag vir die broer te verseker. (Deut 25:5) Nou gebruik die vraagstellers hierdie wet in ‘n hipotetiese verhaal van ‘n vrou wie se man kinderloos gesterf het, die proses het homself herhaal en so was sy uiteindelik met sewe broers getroud. Nou in die tyd van die opstanding, in die hiernamaals, wie se vrou gaan sy nou wees? Dis die dilemma wat hulle voorhou. So probeer die Sadduseërs die waarheid van die opstanding belaglik maak. Gaan sy dan nou dalk sewe mans gelyk moet hê is die implikasie van hulle vraag? Mensekan vandag nog allerhande hipotetiese probleme uitdink om die opstanding en die lewe hierna te probeer belaglik en onmoontlik voorstel. Wat van iemand wat as baba gesterf het, sal hy in die opstanding ook ‘n baba wees en vir altyd ‘n baba bly? Wat as ‘n haai jou opgeëet het, hoe gaan jou liggaam weer bymekaargevoeg word?

Jesus reageer baie skerp en duidelik. “Julle dwaal! En die rede hoekom julle dwaal is tweeledig : Julle ken nie die Bybel nie en julle ken ook nie die krag van God nie!”

Dan lyk dit of Jesus eers iets sê oor God se krag. God se krag en sy werkinge is nie aan ons aardse begrip gebonde nie. Ons moet dit nie probeer beperk met ons aardse verstaan nie. Die huwelik is ‘n tydelike aardse instelling en gaan nie ewig voortbestaan of ‘n funksie hê nie. In die opstanding gaan ons soos engele wees wat nie trou nie, maar dit sal niks van ons volheid en vreugde wegneem nie. Die doel en funksie van die aardse huwelik (hoe kosbaar nou ook al) gaan uitgedien wees! Omdat God se almag onbeperk is, gaan die opstandingslewe ook groter en heerliker wees as wat ons onsself ooit kan indink.

En dan val Jesus die Sadduseërs voluit aan uit die Skrif. Opvallend, Hy kies juis ‘n gedeelte uit die Pentateug wat hulle beweer om te glo. En bewys hulle daaruit verkeerd. Jesus haal aan uit Eksodus 3:6 waar God Homself aan Moses bekend maak as “Ek is die God van ju voorvaders, die God van Abram,die God van Isak, die God van Jakob.” God sê daardeur omdat Hy die God van hulle voorvaders is, Hy nog steeds vir Moses en die Israeliete sal lei en beskerm soos Hy hulle gelei en beskerm het. Dit gaan dus oor God se verbondsgetrouheid. Jesus impliseer dat as Gód getrou is, die dood nie die laaste sê kan hê nie. God se verbondsgetrouheid is sterker as selfs die dood en daarom is daar beslis iets soos ‘n opstanding. God IS hulle God, nog steeds en dit impliseer dat hulle leef in sy teenwoordigheid. Nou is dit Jesus wat die Sadduseërs skoonboul, hulle middelpen spat en hulle kan Hom nie antwoord nie. 

Ons het natuurlik nog minder verskoning om die opstanding te betwyfel as die Sadduseërs. (Inderdaad praat die Ou Testament nie so duidelik daaroor nie) Maar intussen het Jesus self uit die dood opgestaan, liggaamlik! Sy opstanding met 'n verheerlikte liggaam is die waarborg dat almal wat aan Hom behoort ook sal opstaan met 'n nuwe verheerlikte liggaam! (Kliek op SPOKE EET NIE VIS NIE)

Geliefdes, weet dit vandag hier, daar is ‘n opstanding om na uit te sien, daar is ‘n heerlike hiernamaals wat sal aanbreek vir God se kinders. Ons glo dit omdat die Bybel so sê, ons glo dit omdat God se skeppings en herskeppingskrag onbeperk is. Dis nou ons troos!

KYK NA DIE LAM VAN GOD

- die enigste opsie in 'n bitter donker tyd!

Geliefdes enige persoon se dood is ‘n baie hartseer saak, maar soms maak die spesifieke omstandighede dit nog meer hartseer en moeiliker verstaanbaar. Dis vandag so ‘n geval...

Daarom moet ons mooi dink wat ons eintlik vandag hier wil maak. Ons is nie hier om regter te probeer speel nie – God alleen is die volmaakte en regverdige Regter. Ons is ook nie hier om vas te stel presies wat gebeur het en hoekom dit gebeur het nie – God alleen ken die diepste geheime van elke hart; ook van jou en van my... Ons is ook nie hier om goedkoop of sentimentele troos uit te deel nie, God alleen is die diepste Trooster, die God van alle vertroosting!

Ons is wel hier om die evangelie, die Goeie Nuus te hoor! Ja, en dit kan ons vir mekaar duidelik sê : Die evangelie van Jesus Christus skyn helder in die diepste donkerte. Die evangelie van Jesus bring rus en vrede te midde van die grootste onstuimigheid! Die evangelie bring heling in ‘n wêreld van sonde, pyn en gebrokenheid. Die evangelie bring hoop vir die moedeloses en verlorenes. 

Die evangelie kom vandag na ons in die kragtige woorde van Johannes die Doper toe hy Jesus by die Jordaan gesien het : “Dáár is die Lam van God wat die sonde van die wêreld wegneem!” Ons lees dit in Johannes 1:29.

Kom ons kyk net so vinnig na elke faset om die betekenis beter te begryp:

Dáár - Johannes wys weg van homself na ‘n spesifieke persoon, naamlik Jesus as hy sê : “Dáár” Die oplossing vir ‘n sondige stukkende wêreld is nie te vind in onsself nie, nie in bespiegelings nie, nie in ontkenning nie, maar juis om weg te kyk van onsself en Iemand raak te sien, Jesus Christus! Johannes is ‘n wegwyser na Jesus. En dit sien ek ook vandag as my enigste taak. Om net te sê : "Kyk daar, kyk na Jesus, Hy is die antwoord!"

Die Lam van God – Die Lam van God is ‘n heerlike ryk beeld met waarskynlik baie Ou Testamentiese wortels. Dink maar aan God wat die offerlam voorsien het om Isak se lewe te red. Dink aan die Paaslam wat gesterf het in die plek van die eersgebore Israeliete in Egipte. Die paaslam se bloed is dan aan die deurkosyne en drumpel gesmeer sodat die oordeel van God nie die persone binne die huis tref nie. Jesus is die offerlam van God wat in ons plek die straf aan die kruis gedra het. Jesaja 53:5-7 vertel ons van Jesus : “Maar Hy is ter wille van ons oortredinge deurboor, ter wille van ons ongeregtighede is Hy verbrysel; die straf wat vir ons die vrede aanbring, was op Hom, en deur sy wonde het daar vir ons genesing gekom. Ons almal het gedwaal soos skape, ons het elkeen sy eie pad geloop; maar die HERE het die ongeregtigheid van ons almal op Hom laat neerkom. Hy is mishandel, hoewel Hy onderworpe was, en Hy het sy mond nie oopgemaak nie; soos 'n lam wat na die slagplek gelei word en soos 'n skaap wat stom is voor sy skeerders--ja, Hy het sy mond nie oopgemaak nie."

Let wel, Hy is die Lam van God. Hy is deur God gegee, deur God voorsien in ons belang! God het Hom gegee as soenoffer sodat ons vrede kan hê met God! Jesus is God se plan vir die stukkende mensdom.

Wat die sonde van die wêreld wegneem – Jesus het spesifiek gekom ons sonde probleem aan te spreek. Jesus het gekom om ons van ons sonde te bevry! As jy nog nooit ernstig geword het nie, nog nooit benoud geword het oor jou sonde nie, was jy ook nog nooit ernstig oor Jesus nie. Die begrip “wêreld” dui op alle soorte mense en alle soorte sondaars. Natuurlik word nie alle mense outomaties gered nie, maar almal wat Jesus aangeneem het as Verlosser. Johannes 1:11,12 maak dit baie duidelik.

Dit bring ons by ‘n laaste groot waarheid wat dwarsdeur die Johannes evangelie deurgaans beklemtoon. Hierdie nuus dat Jesus die Lam van God is wat die sondes van die wêreld wegneem moet persoonlik geglo word! Anders gesê – Niemand kan in die Koninkryk van God ingaan as hy nie weer gebore word nie!!! Dis mos Jesus se duidelike boodskap aan Nikodemus in Johannes 3.

Jesus is nou vandag hier as Redder! Hy sal wel eendag kom as Regter. Johannes 3:17-19 lees ons “Want God het sy Seun in die wêreld gestuur nie om die wêreld te veroordeel nie, maar dat die wêreld deur Hom gered kan word. Hy wat in Hom glo, word nie veroordeel nie; maar hy wat nie glo nie, is alreeds veroordeel omdat hy nie geglo het in die Naam van die eniggebore Seun van God nie. En dit is die oordeel: dat die lig in die wêreld gekom het, en die mense het die duisternis liewer gehad as die lig; want hulle werke was boos.” Baie mense weier om die verlossing in Jesus te aanvaar want hulle is te lief vir die sonde!

Ek weet baie dinge nie. Daar is baie vra waarop niemand sinvolle antwoorde het nie. Wat ek wel weet is dat Jesus die Lam van God is wat die sonde van die wêreld wegneem. Wat ek ook weet is hierdie Jesus nooi mense na Homself. "En op die laaste dag, die groot dag van die fees, het Jesus gestaan en uitgeroep en gesê: As iemand dors het, laat hom na My toe kom en drink!" (Joh 7:37) Ek weet Hy nooi jou en Hy beloof om as jy na Hom kom jou nie te verwerp nie. (Joh 6:37) Maar jy moet nou kom, want die kragtige uitroep van Johannes oor die identiteit van God se Lam is meer as net ‘n stukkie inligting, dit impliseer dat ek en jy voor ‘n keuse gestel word. Ons is almal of vir of teen Jesus! Jy het nou geleentheid vir die rege keuse, benut dit...

'N BEGRAFNISSTOET KOM TOT STILSTAND

- wanneer Jesus die dood konfronteer en oorwin! 

Die dood maak ons hartseer en wek altyd maar vrae by ons – “Waarom nou Here?” of “Here, kon U dit nie maar gekeer het nie? Hy/sy was nog so jonk!” Die dood laat ontstaan dikwels ‘n verslaentheid of selfs woede by ons. Ja, ons almal as mense staan stom en magteloos voor die wrede werklikheid van die dood. Ons skram maar almal weg van die dood en veral van ons eie nader komende dood. 

Daar is net een Uitsondering. Die mens Jesus Christus. Hy skram nie weg van die dood nie, Hy konfronteer die dood! (LUKAS 7:11-17) Hy vat die dood onbevrees aan! Hier buite die dorpie Nain gebeur dit op ‘n dramatiese manier. Probeer jou die prentjie voorstel... Jesus stop in effek ‘n begrafnisstoet! Dis waarlik net Jesus wat sou waag om dit te doen... Dit lyk amper so voorbarig en byna disrespekvol. Die beste wat ander mense kan doen in die teenwoordigheid van so ‘n treurige prosessie is om eerbiedig toe te kyk of saam te stap. Nie Jesus nie, Hy gryp in!

Twee eienskappe van Jesus is opvallend in hierdie gebeurtenis. Sy medelye en sy almag. 

Jesus het hierdie vrou innig jammer gekry. Hy het opregte meegevoel en medelye. Hierdie was natuurlik ‘n besondere hartseer geval. Hierdie vrou het reeds haar man aan die dood afgestaan en nou word haar enigste seun na die graf gedra. Sy is totaal weerloos en alleen. Jesus is in sy binneste geraak deur die lot van hierdie diep bedroefde weduwee. Hy verstaan ook hoe elke hartseer persoon hier voel...

Opvallend is nie net Jesus se besondere medelye nie, maar ook sy almag. Ja, die hele dorpie voel saam met die vrou en probeer haar ondersteun, maar net Jesus kan regtig ‘n praktiese verskil maak! Hy maak deur sy Goddelike en onbeperkte almag hierdie seun lewend. Nie net Jesus se meegevoel en simpatie bring vir ons hoop nie, maar juis sy almag sluit vir ons die lewe oop! 

Jesus konfronteer die dood en oorwin! Die jongman word terugbesorg aan sy weduwee moeder.

Wat is die betekenis? Beteken dit dat ons nou links en regs vir dooies moet bid en hulle probeer opwek? Nee, ook Jesus self het dit nie gedoen nie. (Die finale opwekking van die dooies met nuwe liggame sal eers by die wederkoms plaasvind.) Nee, hierdie was ‘n demonstrasie van Jesus se almag en ‘n voorskou dat Hyself die dood finaal sou oorwin deur sy opstanding. Hierdie was ‘n teken sodat ons kan begryp wie Jesus is en ons tot Hom kan bekeer.

Die effek van Jesus se opwekkingswonder, maar juis ook die betekenis daarvan kry ons in vers 16. “En vrees het almal aangegryp terwyl hulle God verheerlik en sê: 'n Groot profeet het onder ons opgestaan; en: God het sy volk besoek.”

Jesus is God se finale boodskapper (Profeet), maar ook God se finale besoek aan sy volk. (Hebreërs 1:1) Jesus self is God se finale woord van hoop en bevryding aan ons. Jesus bring die oplossing, die verlossing van sonde en dood. Reeds in Lukas 1:68 kry ons hierdie begrip "besoek" in verband met God se ingrype deur Jesus in die lofsang van Sagaria. "Geloofd sy die Here, die God van Israel, omdat Hy sy volk besoek het en vir hulle verlossing teweeggebring het," Dit gaan oor verlossing!  God het deur Jesus naby aan ons gekom, na ons toe gekom. Hy kom besoek ons in ons sondenood, gebrokenheid, hartseer en verganklikheid. Ja, Hy besoek ons weereens ook vandag hier by die werklikheid van die dood en die graf! Hy kom vestig God se Koninkryk in hierdie stukkende wêreld, ‘n koninkryk waar daar uiteindelik geen sonde en dood sal wees nie, soos Openbaring ons so duidelik leer. Dis net Jesus wat ‘n antwoord het vir die dood. Dis net die evangelie van Jesus wat ware hoop kan bring vir ‘n sterwende wêreld.

Daarom is dit so hartseer dat mense antwoorde op ander plekke soek.

God het ons deur Jesus besoek. God se genade en verlossing het naby gekom. Maar ons moet dit gelowig aanvaar. Ons moet daaroor bly wees! En tog gebeur dikwels die teenoorgestelde... Jesus word geïgnoreer deur mense wat leef soos hulle wil, Jesus se opstandingsdag wat die Sondag is en met blydskap gevier moet word, word vertrap, die evangelie word verwerp. Mag die Heilige Gees tog ons oë open vir wie Jesus werklik is! God wat ons besoek deur Sy Seun. Hy is die antwoord op ons diepste nood ook op hierdie oomblik. Glo in Hom en jy sal sy troos en sy bevryding ervaar. Nou reeds...