TERWYL HY NOG TE VINDE IS…

Die dood van ‘n geliefde onderstreep maar net die feit dat tyd en kanse op aarde verbygaan, wat ons wil doen moet ons nou doen… Die dood naby aan ons bevestig net die werklikheid dat ons aardse bestaan kort is en dat ons nie mag uitstel om vrede met God en ons medemens te maak nie. Die dood verleen vandag weereens dringendheid aan die profeet Jesaja se opdrag : “Soek die HERE terwyl Hy nog te vinde is; roep Hom aan terwyl Hy naby is.” (Jesaja 55:6)

Geliefde, die Woord van die Here kom tot ons wat lewe. (Ek praat dus ook met julle en nie met of van die oorledene nie) Moenie uitstel om met God vrede te maak nie. Die konteks van hierdie dringende oproep is juis die heerlike belofte en uitnodiging in vers 1 wat lees : “o, Almal wat dors het, kom na die waters; en wie geen geld het nie, kom, koop en eet; ja, kom, koop sonder geld en sonder prys, wyn en melk!”

Die implikasie is dat daar nie altyd tyd en geleentheid gaan wees om op hierdie genade uitnodiging van vergifnis en ‘n nuwe lewe te reageer nie. Ja, die Here rig ‘n ruim uitnodiging. Dis aan “almal” Die Here rig ‘n genadige uitnodiging : “koop sonder geld en sonder prys” Die verlossing is verniet. Heeltemal gratis, sonder enige verdienste betrokke. Maar die tyd om dit te aanvaar gaan verby. Genadetyd gaan verby!

Die Here is nou nog te vinde, maar die implikasie is dat Hy nie altyd te vinde sal wees nie! Hy is nou nog naby, die bedoeling is duidelik dat Hy nie altyd naby is nie. Daarom moet jy Hom nou soek.

Wat beteken dit om die Here te soek? Wat sal iemand doen wat die Here soek?

• Wel dis in die eerste plek om God se Woord ernstig op te neem en daarna te verlang. Iemand wat die Here soek, luister na sy Woord en doen moeite om die Here se Woord te hoor. Mense wat Sondae oggende in hulle beddens lê (en net die kinders Sondagskool toe stuur), soek nie God nie! Die Woord is ‘n genademiddel en diegene wat verlang na God se genade sal elke geleentheid aangryp om dit te hoor. Maak jy erns met die Woord?

• Wie die Here soek, sal sy Naam aanroep in die gebed. Gebed is nog ‘n genademiddel. ‘n Kosbare geskenk wat God ons gee. Ons het die heerlike belofte : “Elkeen wat die Naam van die Here aanroep sal gered word.” (Romeine 10:13) Maar jy moet Hom aanroep terwyl daar nog die kans is...

• Om die Here te soek sal noodwendig behels dat ek my verkeerde gedrag en gedagtes die rug sal toekeer. Ek sal omdraai. Ek sal my tot God bekeer. Vers 7 “Laat die goddelose sy weg verlaat en die kwaaddoener sy gedagtes; en laat hy hom tot die HERE bekeer, dan sal Hy hom barmhartig wees; en tot onse God, want Hy vergeef menigvuldiglik. Ek kan nie tegelykertyd die Here soek en nog steeds die sonde najaag nie. Dan is ek mos nie ernstig nie. Ja, die ware soeker weet ek kan myself nie red nie, maar ek het ‘n honger en dors na geregtigheid. Ek smag na bevryding van sondeskuld en sondemag.

• Om die Here te soek sal uiteindelik beteken om gelowig op sy uitnodiging te reageer as eerste prioriteit. Om my geloof op Jesus te stel. Dis om na Jesus self te kom en by Hom die lewe te vind. Om by Hom genade te kry. “Waarom weeg julle geld af vir wat geen brood is nie, en julle arbeid vir wat nie kan versadig nie? Luister aandagtig na My en eet die goeie, en laat julle siel hom in vettigheid verlustig.” (2) Die Here maak dit duidelik dat hulle eie pogings en eie prestasies nie vrede en lewe sal oplewer nie. Julle kan nie julleself versadig en julle eie nood oplos nie. Nee, net Jesus self, die Seun van Dawid kan ware herstel en uitkoms gee! “Neig julle oor en kom na My toe, luister, en julle siel sal lewe; Ek wil met julle 'n ewige verbond sluit: die bestendige genadebewyse van Dawid”. (3) Los julle tevergeefse pogings en eie prestasies, kom na My toe, sê die Here!

Dis ‘n hartseer dag. Mag God ons elkeen vertroosting skenk. Hy wil egter nog meer doen. Hy wil die ewige lewe skenk aan elkeen wat op sy uitnodiging reageer. Doen dit nou, terwyl die geleentheid daar is.

Jesaja 55:1-6 o Almal wat dors het, kom na die waters; en wie geen geld het nie, kom, koop en eet; ja, kom, koop sonder geld en sonder prys, wyn en melk! 

Waarom weeg julle geld af vir wat geen brood is nie, en julle arbeid vir wat nie kan versadig nie? Luister aandagtig na My en eet die goeie, en laat julle siel hom in vettigheid verlustig. 

Neig julle oor en kom na My toe, luister, en julle siel sal lewe; Ek wil met julle 'n ewige verbond sluit: die bestendige genadebewyse van Dawid. 

Kyk, Ek het hom tot 'n getuie van die volke gemaak, tot 'n vors en 'n gebieder van die nasies. 

Kyk, nasies wat jy nie geken het nie, sal jy roep; en nasies wat jou nie geken het nie, sal na jou hardloop, ter wille van die HERE jou God en van die Heilige van Israel, omdat Hy jou verheerlik het. 

Soek die HERE terwyl Hy nog te vinde is; roep Hom aan terwyl Hy naby is.

KYK NUUT NA DIE DOOD

Die apostel Paulus maak ‘n ingrypend radikale stelling as hy in Filippense 1:21 verklaar : “Vir my is die lewe Christus en die sterwe wins.” ‘n Christen kyk anders kyk na die lewe*, ‘n Christen kyk ook anders na die dood. Dis so radikaal anders, dat die gemiddelde normale beskaafde mens dink jy is mal as jy verklaar : “Vir my is die lewe Christus en die sterwe wins.” Inderdaad klink dit mal om te sê : “Vir my is die lewe Christus” en nog maller (veral op ‘n dag soos vandag) om te sê : “die sterwe is wins.”

Geliefdes, hoe sien ons die dood? Mense hou nie daarvan om hieroor te praat nie en probeer dit ten alle koste vermy. Mense hou nie daarvan as jy vir hulle vra : Is jy gereed om te sterwe nie? Vir baie voel dit soos ‘n belediging of sommer net swartgallig en morbied om oor die dood te praat. Vandag hier by die afskeid van ‘n geliefde word ons as’t ware gedwing om hieroor na te dink. (en mag die Here dit positief in elkeen van ons se lewens gebruik) 

Die ware rede vir ons ongemak met die dood is vrees. Die mens het ‘n vrees vir die dood, want diep in ons harte weet ons dat ons dan oop en bloot voor God sal staan wat dwarsdeur ons sal kyk. 

Hierdie algemene vrees en ongemak wat ons oor die dood het, maak Paulus se stelling juis te meer radikaal, anders, heerlik, bevrydend! Waarom kan hy so iets kwytraak? (en onthou net weer hy skryf dit nie in ‘n akademiese omgewing soos ‘n studeerkamer nie, hy sê dit in ‘n tronk waar hyself die dood in die gesig staar) Hoe kry Paulus dit reg om so positief te wees? Die evangeliegebeure, die kruis en opstanding het vir altyd ‘n nuwe wending gebring oor hoe ons die dood moet beoordeel. In die Ou Testament was daar nog baie vaagheid oor die lewe na die dood (selfs vir die vrome koning Hiskia was die dood ‘n verskrikking) In die Nuwe Testament is daar ‘n positiewe siening oor die lewe na die dood en verloor die dood sy verskrikking. Daarom kan Paulus uitroep : “Dood, waar is jou angel? Doderyk, waar is jou oorwinning?” (1 Kor. 15:55) Hierdie nuwe positiewe siening van die dood is die direkte gevolg van Jesus uitwissing van ons sondeskuld aan die kruis (want ons sonde is die rede hoekom ons bang is vir die dood) en sy liggaamlike opstanding uit die graf. Hy het die dood oorwin en die lewe vir ewig ‘n werklikheid gemaak. Het die evangelie al jou siening oor die dood verander?

Soos daar verskillende houdings is oor die lewe is daar vandag verskillende houdings oor die dood. Toets jouself, hoe dink ek oor die dood? Wat is my eintlike gevoel oor die dood?

VREES vir die dood. Dis die groot vyand, die donker, skrikwekkende einde, waaraan ek liewers nie eens wil dink nie.

GELATE AANVAARDING van die dood. Ag, almal moet maar doodgaan... Ons trek maar skouers op...

DAPPER HOUDING teenoor die dood. Ek sal nie bang wees nie en sal nie wys ek is bang nie. Amper ‘n uitdagende houding. Ek sal nie huil nie, nie eers vandag nie...

SENTIMENTELE NAÏWITEIT rondom die dood. Mens hoor dit deesdae baie by roudienste en huldeblyke... “John speel nou rugby in die hemel vir die eerste span, Kobus jaag nou “rally” in die goue strate, Gert is seker stout soos altyd en die engele moet maar net aanpas en verlief neem...” Sentimentele snert, uitgespreek deur mense wat totaal onkundig is oor die Bybel se boodskap!

Die Woord van God daag ons vandag uit tot 'n nuwe siening:

DOOD IS WINS! 

Die Christen se siening is iets heel anders : Die sterwe is wins! Nie net die afwesigheid van vrees nie, maar ‘n positiewe uitsien daarna. Maar ook ‘n nugtere berekende uitsien, gebou op feite! Bybelse feite, Goddelike waarheidsfeite. Dis met ander woorde nie 'n futiele wensdenkery nie.

Wat beteken hierdie wins nou prakties? Twee sleutelbegrippe wat ons in Fil. 1:23 kry is belangrik : “heengaan, met Christus” 

"...ek verlang daarna om heen te gaan en met Christus te wees, want dit is verreweg die beste;" (vers 23) 

Wat sou hy bedoel met heengaan? 2 Kor. 5:1 gee vir ons ‘n leidraad. “Want ons weet dat as ons aardse tentwoning afgebreek word, ons 'n gebou het van God, 'n huis nie met hande gemaak nie, ewig, in die hemele.” Die dood is nie meer ‘n verskrikking nie, dis nie ‘n donker einde nie, dis ‘n verhuising van ‘n tydelike woning na ‘n ewige woning. Dis net ‘n oppak en vertrek na my finale blyplek.

Die kernrede vir Paulus se blydskap (en positiewe velrange) is dat hy met (by) Christus sal wees. Van aangesig tot aangesig sal ek Hom sien wat my liefgehad het en sy lewe vir my gegee het. Onbelemmerde en onverstoorde gemeenskap met die volmaak liefdevolle Jesus Christus. Geen pyn, geen sonde, geen twyfel, geen stryd, net die volmaakte teenwoordigheid van onbeskryflike liefde! Tuiskoms by my ware vaderland en my ware Redder-Koning! Paulus stel dit so : “Want ons burgerskap is in die hemele, van waar ons ook as Verlosser verwag die Here Jesus Christus," (Fil. 3:20)

Die kind van God het ‘n unieke beskouing van die lewe en van die dood! “Vir my is die lewe Christus en die sterwe wins.” Die “en” is baie belangrik. Dit koppel die twee helftes aanmekaar. NET mense wat kan verklaar “Vir my is die lewe Christus”, kan ook met vertroue sê : “die sterwe is wins.” Kan jy dit sê? Dit maak die verskil...AMEN

Om beter te verstaan wat beteken, “vir my is die lewe Christus”, kliek op LEWE

ANDERKANT DIE GRAF...

wag daar onbeskryflike heerlikheid vir God se kinders.

Die dood is nie die einde van die menslike bestaan nie. Daar is twee duidelike bestemmings....Dis die helder boodskap van die Bybel. Dit word ook bevestig in 'n merkwaardig egte en betroubare getuienis van ds. de Kock. Lees dit en jy sal nie spyt wees nie. Kliek op GRENSE VAN DIE EWIGHEID.

JA, DAAR IS 'N HIERNAMAALS

- want God is almagtig en Sy Woord is waar! 

[lees Markus 12:18-27]

Mense spot deesdae baie graag met die hiernamaals, dis amper asof sommige ‘n lewe anderkant die graf minag. “Ag, glo jy regtig in ‘n pie in the sky when you die?”, koggel hulle. By ander mense hoor mens amper ‘n fatalistiese houding :”Jong, ons moet maar net nou vir mekaar goed wees, laat ons maar nou ‘n dop saam drink, daar is nie ‘n eendag nie, daar is nie ‘n ewigheid nie! Kyk maar wat jy uit die lewe kan kry en vergeet van ‘n lewe na die dood.” Dis die tipe van houding waarna Paulus verwys : “Laat ons eet en drink, want môre sterf ons!” 

Natuurlik is dit inderdaad ‘n Bybelse boodskap dat hierdie lewe belangrik is, dat ons nou ten volle moet leef, dat ons nou moet liefde bewys, nou iets moet doen aan armes en hongeriges... Goeie werke is immers iets wat nou op hierdie aarde gedoen moet word! Maar spesifiek op 'n dag soos vandag moet ons nooit vergeet dat die heerlike opstanding uit die dood nog altyd deel was van die kern van die Christelike boodskap van hoop nie. DAAR IS 'N OPSTANDING UIT DIE DOOD!  As jy die opstanding wegvat, vat jy die hart van die evangelie weg en bly daar niks evangelie oor nie! Hieroor is die apostel baie duidelik : “As ons net vir hierdie lewe ons hoop op Christus vestig, is ons die bejammerenswaardigste van alle mense.” (1 Kor. 15:19)

‘n Spottery met die hiernamaals en met die opstanding is eintlik ‘n aanval op die almag van God en die evangelie van Jesus Christus. 

Sulke aanvalle is ook niks nuuts nie. Dis presies wat die Sadduseërs doen in Markus 12. Die Sadduseërs was destyds een van die twee hoof Joodse groeperinge (die ander groep was die Fariseërs). Hulle het net die eerste vyf boeke van Moses as bron van gesag erken en volgens hulle het daar niks gestaan van ‘n opstanding nie en het hulle nie aan ‘n opstanding en ook nie aan engele geglo nie. Die Sadduseërs kom nou met ‘n strikvraag na Jesus toe en dink hulle gaan hom uitboul en in die verleentheid stel. Die agtergrond van hulle vraag is die Mosaïese bepaling oor die leviraatshuwelik. Dit was ‘n wet wat voorsiening gemaak het dat ‘n man ‘n verantwoordelikheid het as sy broer kinderloos sou sterwe om met die gestorwe broer se vrou te trou en so ‘n nageslag vir die broer te verseker. (Deut 25:5) Nou gebruik die vraagstellers hierdie wet in ‘n hipotetiese verhaal van ‘n vrou wie se man kinderloos gesterf het, die proses het homself herhaal en so was sy uiteindelik met sewe broers getroud. Nou in die tyd van die opstanding, in die hiernamaals, wie se vrou gaan sy nou wees? Dis die dilemma wat hulle voorhou. So probeer die Sadduseërs die waarheid van die opstanding belaglik maak. Gaan sy dan nou dalk sewe mans gelyk moet hê is die implikasie van hulle vraag? Mensekan vandag nog allerhande hipotetiese probleme uitdink om die opstanding en die lewe hierna te probeer belaglik en onmoontlik voorstel. Wat van iemand wat as baba gesterf het, sal hy in die opstanding ook ‘n baba wees en vir altyd ‘n baba bly? Wat as ‘n haai jou opgeëet het, hoe gaan jou liggaam weer bymekaargevoeg word?

Jesus reageer baie skerp en duidelik. “Julle dwaal! En die rede hoekom julle dwaal is tweeledig : Julle ken nie die Bybel nie en julle ken ook nie die krag van God nie!”

Dan lyk dit of Jesus eers iets sê oor God se krag. God se krag en sy werkinge is nie aan ons aardse begrip gebonde nie. Ons moet dit nie probeer beperk met ons aardse verstaan nie. Die huwelik is ‘n tydelike aardse instelling en gaan nie ewig voortbestaan of ‘n funksie hê nie. In die opstanding gaan ons soos engele wees wat nie trou nie, maar dit sal niks van ons volheid en vreugde wegneem nie. Die doel en funksie van die aardse huwelik (hoe kosbaar nou ook al) gaan uitgedien wees! Omdat God se almag onbeperk is, gaan die opstandingslewe ook groter en heerliker wees as wat ons onsself ooit kan indink.

En dan val Jesus die Sadduseërs voluit aan uit die Skrif. Opvallend, Hy kies juis ‘n gedeelte uit die Pentateug wat hulle beweer om te glo. En bewys hulle daaruit verkeerd. Jesus haal aan uit Eksodus 3:6 waar God Homself aan Moses bekend maak as “Ek is die God van ju voorvaders, die God van Abram,die God van Isak, die God van Jakob.” God sê daardeur omdat Hy die God van hulle voorvaders is, Hy nog steeds vir Moses en die Israeliete sal lei en beskerm soos Hy hulle gelei en beskerm het. Dit gaan dus oor God se verbondsgetrouheid. Jesus impliseer dat as Gód getrou is, die dood nie die laaste sê kan hê nie. God se verbondsgetrouheid is sterker as selfs die dood en daarom is daar beslis iets soos ‘n opstanding. God IS hulle God, nog steeds en dit impliseer dat hulle leef in sy teenwoordigheid. Nou is dit Jesus wat die Sadduseërs skoonboul, hulle middelpen spat en hulle kan Hom nie antwoord nie. 

Ons het natuurlik nog minder verskoning om die opstanding te betwyfel as die Sadduseërs. (Inderdaad praat die Ou Testament nie so duidelik daaroor nie) Maar intussen het Jesus self uit die dood opgestaan, liggaamlik! Sy opstanding met 'n verheerlikte liggaam is die waarborg dat almal wat aan Hom behoort ook sal opstaan met 'n nuwe verheerlikte liggaam! (Kliek op SPOKE EET NIE VIS NIE)

Geliefdes, weet dit vandag hier, daar is ‘n opstanding om na uit te sien, daar is ‘n heerlike hiernamaals wat sal aanbreek vir God se kinders. Ons glo dit omdat die Bybel so sê, ons glo dit omdat God se skeppings en herskeppingskrag onbeperk is. Dis nou ons troos!

KYK NA DIE LAM VAN GOD

- die enigste opsie in 'n bitter donker tyd!

Geliefdes enige persoon se dood is ‘n baie hartseer saak, maar soms maak die spesifieke omstandighede dit nog meer hartseer en moeiliker verstaanbaar. Dis vandag so ‘n geval...

Daarom moet ons mooi dink wat ons eintlik vandag hier wil maak. Ons is nie hier om regter te probeer speel nie – God alleen is die volmaakte en regverdige Regter. Ons is ook nie hier om vas te stel presies wat gebeur het en hoekom dit gebeur het nie – God alleen ken die diepste geheime van elke hart; ook van jou en van my... Ons is ook nie hier om goedkoop of sentimentele troos uit te deel nie, God alleen is die diepste Trooster, die God van alle vertroosting!

Ons is wel hier om die evangelie, die Goeie Nuus te hoor! Ja, en dit kan ons vir mekaar duidelik sê : Die evangelie van Jesus Christus skyn helder in die diepste donkerte. Die evangelie van Jesus bring rus en vrede te midde van die grootste onstuimigheid! Die evangelie bring heling in ‘n wêreld van sonde, pyn en gebrokenheid. Die evangelie bring hoop vir die moedeloses en verlorenes. 

Die evangelie kom vandag na ons in die kragtige woorde van Johannes die Doper toe hy Jesus by die Jordaan gesien het : “Dáár is die Lam van God wat die sonde van die wêreld wegneem!” Ons lees dit in Johannes 1:29.

Kom ons kyk net so vinnig na elke faset om die betekenis beter te begryp:

Dáár - Johannes wys weg van homself na ‘n spesifieke persoon, naamlik Jesus as hy sê : “Dáár” Die oplossing vir ‘n sondige stukkende wêreld is nie te vind in onsself nie, nie in bespiegelings nie, nie in ontkenning nie, maar juis om weg te kyk van onsself en Iemand raak te sien, Jesus Christus! Johannes is ‘n wegwyser na Jesus. En dit sien ek ook vandag as my enigste taak. Om net te sê : "Kyk daar, kyk na Jesus, Hy is die antwoord!"

Die Lam van God – Die Lam van God is ‘n heerlike ryk beeld met waarskynlik baie Ou Testamentiese wortels. Dink maar aan God wat die offerlam voorsien het om Isak se lewe te red. Dink aan die Paaslam wat gesterf het in die plek van die eersgebore Israeliete in Egipte. Die paaslam se bloed is dan aan die deurkosyne en drumpel gesmeer sodat die oordeel van God nie die persone binne die huis tref nie. Jesus is die offerlam van God wat in ons plek die straf aan die kruis gedra het. Jesaja 53:5-7 vertel ons van Jesus : “Maar Hy is ter wille van ons oortredinge deurboor, ter wille van ons ongeregtighede is Hy verbrysel; die straf wat vir ons die vrede aanbring, was op Hom, en deur sy wonde het daar vir ons genesing gekom. Ons almal het gedwaal soos skape, ons het elkeen sy eie pad geloop; maar die HERE het die ongeregtigheid van ons almal op Hom laat neerkom. Hy is mishandel, hoewel Hy onderworpe was, en Hy het sy mond nie oopgemaak nie; soos 'n lam wat na die slagplek gelei word en soos 'n skaap wat stom is voor sy skeerders--ja, Hy het sy mond nie oopgemaak nie."

Let wel, Hy is die Lam van God. Hy is deur God gegee, deur God voorsien in ons belang! God het Hom gegee as soenoffer sodat ons vrede kan hê met God! Jesus is God se plan vir die stukkende mensdom.

Wat die sonde van die wêreld wegneem – Jesus het spesifiek gekom ons sonde probleem aan te spreek. Jesus het gekom om ons van ons sonde te bevry! As jy nog nooit ernstig geword het nie, nog nooit benoud geword het oor jou sonde nie, was jy ook nog nooit ernstig oor Jesus nie. Die begrip “wêreld” dui op alle soorte mense en alle soorte sondaars. Natuurlik word nie alle mense outomaties gered nie, maar almal wat Jesus aangeneem het as Verlosser. Johannes 1:11,12 maak dit baie duidelik.

Dit bring ons by ‘n laaste groot waarheid wat dwarsdeur die Johannes evangelie deurgaans beklemtoon. Hierdie nuus dat Jesus die Lam van God is wat die sondes van die wêreld wegneem moet persoonlik geglo word! Anders gesê – Niemand kan in die Koninkryk van God ingaan as hy nie weer gebore word nie!!! Dis mos Jesus se duidelike boodskap aan Nikodemus in Johannes 3.

Jesus is nou vandag hier as Redder! Hy sal wel eendag kom as Regter. Johannes 3:17-19 lees ons “Want God het sy Seun in die wêreld gestuur nie om die wêreld te veroordeel nie, maar dat die wêreld deur Hom gered kan word. Hy wat in Hom glo, word nie veroordeel nie; maar hy wat nie glo nie, is alreeds veroordeel omdat hy nie geglo het in die Naam van die eniggebore Seun van God nie. En dit is die oordeel: dat die lig in die wêreld gekom het, en die mense het die duisternis liewer gehad as die lig; want hulle werke was boos.” Baie mense weier om die verlossing in Jesus te aanvaar want hulle is te lief vir die sonde!

Ek weet baie dinge nie. Daar is baie vra waarop niemand sinvolle antwoorde het nie. Wat ek wel weet is dat Jesus die Lam van God is wat die sonde van die wêreld wegneem. Wat ek ook weet is hierdie Jesus nooi mense na Homself. "En op die laaste dag, die groot dag van die fees, het Jesus gestaan en uitgeroep en gesê: As iemand dors het, laat hom na My toe kom en drink!" (Joh 7:37) Ek weet Hy nooi jou en Hy beloof om as jy na Hom kom jou nie te verwerp nie. (Joh 6:37) Maar jy moet nou kom, want die kragtige uitroep van Johannes oor die identiteit van God se Lam is meer as net ‘n stukkie inligting, dit impliseer dat ek en jy voor ‘n keuse gestel word. Ons is almal of vir of teen Jesus! Jy het nou geleentheid vir die rege keuse, benut dit...

IMMANUEL SE TROOSVOLLE UITNODIGING

As iemand na aan ons sterf, raak dit mens baie diep, trouens dit raak nie net nie, dit sny, dit maak ons binneste stukkend, flenters... En dis dan dat mens begin wonder waar God in die prentjie pas. Waar is Hy, gee Hy om, verstaan Hy, hoe maak Hy 'n verskil? Die groot troos is dat God nie ver is nie, maar naby is, baie, baie naby! Hoe so? Wel die Matteusevangelie vertel sommer reg aan die begin waar dit oor Jesus se geboorte gaan dat Hy IMMANUEL is, dit wil sê : "God met ons" (Matteus 1:22,23) Jesus is God wat mens geword het, wat as't ware in ons bestaan ingeklim het en alles ervaar en gely het, wat ons ervaar en ly... ja, alle hartseer, swaarkry en dood!

Hierdie Jesus, ja Immanuel is vandag op hierdie hartseer oomblik ook hier waar ons afskeid neem van 'n geliefde...

En Hy is hier met 'n besondere uitnodiging aan elkeen van julle! Kom ons lees dit in Matteus 11:28-30.

"Kom na My toe, almal wat uitgeput en oorlaai is, en Ek sal julle rus gee.

Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed.

My juk is sag en my las is lig."

Kom ons bekyk net hierdie kosbare uitnodiging van Jesus :

KOM - dis seker een van die eerste woordjies wat enige kleuter leer. Maklik verstaanbaar. Dis 'n uitnodiging. Elkeen moet daarop reageer..

NA MY - die uitnodig wat Jesus maak is nie 'n uitnodiging bloot om kerk toe te kom of godsdienstig te word of om te probeer om 'n nuwe blaadjie om te slaan nie. Nee, dis baie persoonlik 'n uitnodiging om na HOM te kom, die Lewende Seun van God! Hy roep jou na Homself!

ALMAL - wie mag kom? Wel, Jesus se woorde is baie duidelik - "almal" - dit sluit vir jou en my in. Dit sluit jou in wat dalk op hierie oomblik ver van God is, kwaad is, rebels is, afgedwaal het... Jesus kan nie lieg nie, as Hy sê "almal" dan is dit almal. Almal wat nood het, diegene wat "uitgeput en oorlaai is" (Wat presies hierdie nood is, sal ons beter verstaan as ons verstaan wat Jesus met "rus" bedoel.)

RUS -  Wat sou Jesus met rus bedoel? Dit gaan tog seker nie oor vakansie nie? Ons moet terugggaan na die Skeppingsverhaal om dit reg te verstaan. Ons lees dat God na sy skeppingswerk op die sewende dag "gerus" het. Wat beteken dit God kan mos nie moeg word nie? Nee, hierdie rus beteken dat God tevrede was met sy volmaakte skepping, Hy het sy doel bereik!Alles was soos dit moes wees. Daar was RUS!  Daar was volkome harmonie.  MAAR, toe kom die sondeval en die rus word versteur! Die skepping en baie spesifiek die mens se bestaan word verontrus deur SONDE, SWAARKRY, SIEKTE en STERFLIKHEID!

Hierdie onrus en disharmonie raak ons almal. Ons voel dit aan ons eie lyf. Ons elkeen is besmet met sonde. Die gevolge van sonde raak ons ook almal. Ons beleef swaarkry, ons is blootgestel aan siekte en allerhande ellende en die groot donker wolk van sterflikheid hang dreigend oor elkeen van ons. Ons het nood! Dit put ons uit, dis 'n las wat ons nie kan dra nie!

En nou in hierdie omstandigheid kom nooi Jesus jou na Homself toe uit en bied aan om vir jou rus te gee! Rus as antwoord op die ellende van sonde, swaarkry, siekte en sterflikheid!

So wat beteken die rus prakties? Eerstens dat Hy ons van ons sondeskuld en sondemag bevry! Hy doen dit deurdat Hy aan die kruis die volledige straf vir ons sonde op Hom geneem het! (Jesaja 53:5,6) Elkeen, ja jy ook, wat in die geloof na Hom kom ontvang volkome vryspraak van sonde. Jy word God se kind, jy verkry toegang tot die ewige heerlikheid!

Maar, wat dan nou van die swaarkry, die siekte en die sterflikheid? Jesus bring ook daarvoor die oplossing. Deur sy sterwe en opstanding het Hy nie alleen vergifnis gebring nie, maar ook die waarborg van 'n nuwe skepping! 'n Nuwe hemel en 'n nuwe aarde! Daar sal geen swaarkry, siekte of sterflikheid wees nie! Ons gaan bevry word van alle verganklikheid! Ons gaan nuwe liggame kry sonder enige pyn, smet of rimpel! Dis iets waarna elke ware kind van God uitsien! Dis die troos vir God se kinders in 'n stukkende wêreld, dit maak dat ons nie moed verloor of deur smart oorweldig word nie... daar wag 'n heerlike toekoms vir elkeen wat aan Jesus behoort!

Het jy al na Jesus gekom? Waarom nie? Miskien is jy huiwerig en bang. Jy wonder wat Jesus met jou gaan doen, want jy die ken jou eie boosheid. Jy is bang vir verwyte en veroordeling. Jy is bang vir sy "juk", sy opdragte en standaarde. Bang om jouself aan Hom te onderwerp. Dis asof Jesus ons huiwering aanvoel. Hy verseker ons Hy is "sagmoedig en nederig". Hoe wonderlik! Jesus is nie 'n harde meester of wrede diktator nie. Hy gaan jou nie in die tande skop as jy op die grond lê nie, Hy is sagmoedig! Dis wonderlik dat Jesus self juis hierdie een eienskap uitsonder! Hy moedig jou aan om na Hom te kom. 

Kom, jy het niks te vrees nie! Kom na Hom vir volle vergifnis, rus en vrede. Kom na Hom sodat jy ook verseker kan wees van die ewige rus en daarom nie bang hoef te wees vir die dood nie!