Saterdag 04 November 2023

Waar is hy/sy NOU?

TOE JY VAN SY/HAAR DOOD HOOR, WAS JY DIEP ONTSTELD!


 Wanneer ons hoor iemand het gesterf - wonder mens onwillekeurig : "Waar is hy NOU?" Of jy is op 'n staptog in die veld en loop toevallig verby 'n ou graf dan gaan die gedagtes ook wwer in daardie rigting : "Waar is hierdie persoon NOU - vir ewig in die teenwoordigheid van God of dalk iewers anders?"

Baie beslis is dit nie ons taak om te oordeel nie - gelukkig God alleen sal dit doen. Maar gelukkig laat die Bybel ons nie in die duister wat betref die belangrikste vraag in die lewe nie!

"HOE WORD 'N MENS GERED?"

Die antwoord op hierdie vraag word helder in die Heilige Skrif geantwoord sommer op baie plekke. Een so 'n besondere plek is daardie geleentheid toe die profeet JESAJA 'n buitengewone, aangrypende VISIOEN gesien het!




Kliek op VISIOEN om te luister.


Maandag 31 Julie 2023

Ek sien uit hierna!

 DIE GROOT VERWAGTING – deel jy ook hierin?

Die dood van ‘n geliefde dwing ons elkeen om weer na te dink oor ons menslike bestaan. Ons bestaan nou hier, maar ook hierna... Dis goed om bietjie tot stilstand te kom in hierdie gejaagde lewe en ‘n slag deeglik te dink oor ons bestaan nou en natuurlik ons ewige bestemming...

Dis baie duidelik dat ons bestaan tydelik is. Ons leef nie vir altyd nie. Maak nie saak hoe gesond, fiks, sterk of taai jy is nie. Die jare haal ons almal in. Die uurglas loop en niemand kan dit eers vir een sekonde keer nie. Maar al weet ons dit vang die dood ons telkens maar weer onverwags. Ja, ons weet die dood moet kom, maar ai net nie nou nie... Ons moes nog eers dit of dat gedoen het, ons moes dalk nog iets uitgepraat het, vrede gemaak het, iets reggestel het en nou is dit vir ewig te laat! Die dood onderstreep elke keer as ons daarvan hoor, as ons dit sien... die belangrikheid van NOU.  Hieraan herinner Jesaja 55:6 ons so treffend - Soek die Here terwyl Hy Hom laat vind, roep Hom aan terwyl Hy naby is.”





Maar die werklikheid van die dood fokus ons weer ook en veral op die bestaan hierna en ons ewige bestemming. Ek wil twee aspekte onderstreep vanuit 2 Petrus 3:13.


Maar ons verwag, volgens sy belofte, nuwe hemele en 'n nuwe aarde, waar geregtigheid woon.

God se kinders het iets ontsagwekkend heerlik om na uit te sien en dit word genoem die nuwe hemel en die nuwe aarde. God gaan sy hele skepping nuut maak. Ons moet onthou die hele skepping ly onder die gevolge van die sondeval. Die sonde van die mens het skrikwekkende gevolge vir die hele skepping... voortgaande sonde, swaarkry, siekte en sterflikheid. Die hele skepping is aan verganklikheid onderworpe. Alles word oud en stukkend en als sterf en gaan tot niet. God laat vaar egter nie die werke van sy hande nie. Deur Jesus het God redding en bevryding vir die hele skepping gebring. Hy maak sondaars wat in Hom glo nuut. Geestelik nuut, maar ook liggaamlik nuut! Die totale mens in sy geheel sal gered word... verlos van sonde en straf, maar ook verlos van verganklikheid. Die opstanding van Jesus waarborg ons vergifnis, maar dit waarborg ook ons fisiese opstanding. As nuwe mense gaan ons in ‘n nuwe skepping woon. Hierdie belofte word reeds in die Ou Testament gemaak. Jesaja 65:17 - “Ja, Ek gaan 'n nuwe hemel en 'n nuwe aarde skep. Aan die vroeëres sal nie meer gedink word nie; dit sal nie in mense se gedagtes opkom nie.”

Die nuwe skepping het reeds begin met Jesus se opstanding. Ons vier die werklikheid daarvan elke Sondag, sy opstandingsdag. Die volmaakte aanbreek daarvan sal plaasvind by die wederkoms van Jesus en God se kinders sien uit daarna. Ja dan sal ons liggame ook verlos word! Ons bely immers die “opstanding van die vlees.”

Die heerlike feit oor God se nuwe skepping is dat geregtigheid daar sal woon. Reg en geregtigheid sal daar heers. Daar sal geen onreg en sonde meer wees nie. Daarom sal daar ook geen onreg en sonde toegelaat word in die nuwe Jerusalem nie. Dis ‘n heerlike verwagting, want dis juis sonde en onreg wat soveel hartseer, smart, skade en ellende hier op aarde veroorsaak. Dink maar aan die hartseer wat gierigheid, leuens, haat en onmin veroorsaak... In God se nuwe skepping sal daar niks hiervan wees nie, ons sal nie eens meer daaraan dink nie, dit sal nie in “ons gedagtes opkom nie,” het ons gelees.

Hierdie verwagting van ‘n nuwe skepping sonder sonde en hartseer, waar ons gefokus sal wees op die heerlikheid van God en die Lam wat vir ons geslag is, is ons troos in hierdie wêreld, nou, hier... Maar hier is ook ‘n duidelike waarskuwing opgesluit. Elkeen wat nie deur bekering tot Jesus en ware geloof in Jesus vergifnis en reiniging van sonde ontvang nie, sal vir ewig uitgesluit word van die nuwe hemel en aarde. Vir ewig in die duisternis, weg van God se aangesig. Mag elkeen van ons betyds reageer op die evangelie uitnodiging en deel in hierdie heerlike verwagting waarvan Petrus hier praat. Amen.


Vir 'n insiggewende video oor ons huidige smart, maar ook die heerlikheid wat wag, kliek op HEERLIKHEID

Saterdag 27 Augustus 2022

KAN DIT WAAR WEES? JA, BESLIS!


[Vooraf - Besef ons wat ’n voorreg dit is om op ’n oomblik soos hierdie God se Woord te hê? As dit oor die dood gaan staan ons as mense maar sprakeloos - wat sal ons nou kan sê? Ons staan ook magteloos - wat kan die slimste of sterkste van ons daaraan doen? Niemand van ons kan regtig iets sinvols sê of doen nie, maar nou is ons bevoorreg om te hoor wat God die lewende God self vir ons in ’n situasie soos hierdie sê.] 

Maak assbelief die Woord oop by Filippense hoofstuk 1. Ons lees van vers 20 tot 24.

Dit is my vurige verlange, en daarna sien ek uit, dat ek niks sal doen waaroor ek my sal hoef te skaam nie. Ek wil ook nou, soos nog altyd, met alle vrymoedigheid deur my hele wese Christus verheerlik in lewe en in sterwe,
want om te lewe, is vir my Christus, en om te sterwe, is vir my wins.
As ek in die lewe bly, kan ek voortgaan met vrugbare arbeid. Wat ek moet kies, weet ek nie.
Ek is in ‘n tweestryd: ek verlang daarna om heen te gaan en met Christus te wees, want dit is verreweg die beste;
maar in julle belang is dit noodsaakliker dat ek bly lewe.

Ons is vandag hier bymekaar omdat die werklikheid van die dood van ’n geliefde ons bymekaar gebring het. Ek sê werklikheid van die dood - want al hou ons nie van die dood nie, al praat ons nie graag daaroor nie - dit bly ’n feit. Dis die een poort waardeur ons almal moet gaan. (tensy ons sou leef by die  wederkoms) Die dood is onlosmaaklik deel van ons verganklike wêreld en ons brose bestaan. Ons praat so maklik van die “land van die lewendes” - iemand het gesê “this world is the world of the dying - the next is the land of the living.” Ons almal hier bymekaar is inderdaad sterflinge - ons is sterwend ons weet nog net nie wanneer die proses voltooi sal word nie.

Vir Paulus was die dood ook ’n werklikheid. Hy het voortdurend in die skaduwee van die dood geleef: sy lewe is juis bedreig is as gevolg van sy evangelieverkondiging. As hy hierdie brief aan die Filippense skryf is hy juis weer in die tronk en hy hou rekening met die feit dat hy dalk kan sterf. En dis nou juis so merkwaardig - in hierdie situasie maak hy ’n baie radikale uitspraak oor die dood ; “om te sterwe is vir my wins!” Kom ons kyk net kortliks na hierdie uitspraak vanuit twee hoeke: Wat bedoel hy hiermee? En hoekom kan hy so ’n radikale ding sê?

1) Wat bedoel Paulus?

Sterwe is wins! Die dood is tot my voordeel! Ek wen op hierdie transaksie. Met respek wil mens tog vra : "Paulus is jy regtig eerlik? Is dit nie dalk sommer nou net sedige predikantspraatjies nie? Aangeplakte vroomheid?"  Wees verseker, Paulus bedoel wel wat hy sê. Dis nie ’n wilde halsoorkop stelling nie. Ons sal sien wat hy hier sê is weldeurdag en hy het grondige redes daarvoor. Dis ook nie ’n vroom stuk teorie, wat by ’n lessenaar in ’n gerieflike kantoor uitgedink word nie. Nee, dis ’n glashelder oortuigde waarheid wat hom verbly daar binne in sy tronksel!

So wat bedoel hy met die sterwe is wins? Hy bedoel inderdaad dat die baie voordelig sal wees as hy doodgaan. Hoekom sou die dood vir hom voordelig wees? Mens sou ’n hele paar redes uit sy geskrifte kon aflei:

~ die dood bring vir Paulus ’n einde aan lyding en stryd. Ja, vir elke opregte Christen beteken dit die einde van gespot en uitstoting, van lyding op baie maniere - vir Paulus ook einde aan fisiese lyding ter wille van die evangelie.

~ die dood bring ook vir die kind van God die einde van die stryd teen sonde en onvolmaaktheid. Dis immers die daaglikse stryd waarvan elke kind van God goed weet - ek moet stry teen versoekings en sonde! Teen die lsite en aanvegtinge van Satan. En dis 'n uitputtende stryd!

~ die dood is nie ’n verskrikking vir die kind van God wat getrou gebly het nie. Daar wag ’n heerlike beloning by die wederkoms! *

~ daar is egter nog iets wat Paulus kan mens amper sê opgewonde maak oor die dood - hy weet hy gaan nou by Christus wees (23) Terloops, hieruit kan ons duidelik aflei dat Christene wat sterwe onmiddellik in Christus se teenwoordigheid is - al sal ons liggame eers by die wederkoms opgewek word. Paulus is vas oortuig, hy gaan sy lewende Verlosser persoonlik sien sodra hy sterf! Die Jesus wat in sy plek al sy skuld gedra het en daarvoor gestraf het. Hy gaan kyk in die oë van Jesus wat hom oneindig liefgehad het, hy gaan die spykermerke in sy hande en voete sien wat Jesus moes ontbeer vir sy aaklige sonde! Kan jy dit insien? Om hierdie rede is Paulus nie meer net nie bang nie, nee hy sien selfs uit na die dood, hy verlang daarna. (daarom praat hy van ’n tweestryd - weet hy het nog werk twv die Christene, maar eintlik wil hy eerder by Christus wees)

2) Waarom kon Paulus so seker wees dat die dood al hierdie genoemde voordele vir hom sou bring? 

Dis tog duidelik dat nie alle mense rede het om uit te sien na die dood nie. trouens vir baie mense is die dood ’n verskrikking, ’n angswekkende maar onvermydelike ontmoeting. So waarom kan Paulus so positief wees? Ons kry die antwoord in die eerste helfte van die vers. "om te lewe is vir my Christus". Nou in die vorige vers sê hy wat hy hiermee bedoel. Sy lewe draai daarom om Christus te verheerlik. (20) Wat beteken dit om Christus te verheerlik? Hoekom en hoe verheerlik mens Christus? Ons kry die leidrade in Paulus se lewe en sy briewe.

Alles het begin daar op pad na Damaskus. Jy ken mos die verhaal in Handelinge 9. Jesus self het daar beslag gelê op Paulus lewe, hom geroep en Paulus het met nederige onderwerping geantwoord. Almal van ons hoor nie ’n stem nie, almal sien nie ’n lig nie - maar ek is seker almal van ons hier is al gekonfronteer met Jesus! Jy weet wie Hy is, jy het al baie van Hom gehoor. Het jy al in oorgawe gebuig? 

Die punt is maar net dit : slegs mense wat persoonlik Jesus se heerskappy aanvaar het en aan Hom behoort sal eendag die dood as voordelig beleef. Ons sien Paulus het ’n verlange en sekerheid  - die twee sake hou verband met mekaar. 

Dis tog net logies. Dis net as ek seker is dat my sonde vergewe is, dat ek sal kan uitsien om Christus te sien. As my sonde en skuld nog aan my kleef sal ek nie Christus wil sien nie. As my gewete belas en my siel nog met boosheid besmet is, sal die wete om voor die heilige Jesus te verskyn my verskrik. Nou kan mens verstaan waarom Paulus met vreugde uitsien om Christus te ontmoet - Hy het vergifnis ontvang, hy is vrygespreek van al sy sondeskuld. Hoe het dit gebeur? Ons vind die antwoord in dieselfde brief - “en een met Hom kan wees: vrygespreek, nie omdat ek die wet onderhou nie, maar omdat ek in Christus glo. Dit is die vryspraak wat God gee omdat ‘n mens in Hom glo.” (3:9) Hy het persoonlik in Jesus sy vertroue gestel. U sien dis die basis van Paulus se sekerheid en verlange - hy het ’n persoonlike vertroue op die gekruisigde Jesus. Hy roem in die kruis!

Paulus het verlossing en vergifnis, ja lewe in Jesus gevind. Dit gaan egter nog verder. Dit beteken dat Jesus die einddoel en die sin van sy lewe was. Die middelpunt van sy bestaan. Sy lewe het gesentreer rondom Jesus. Sy lewe was ’n offer aan Christus. Dit word so pragtig uitgespel in 3:10. (NAB -1983) “Al wat ek wens, is om Christus te ken, die krag van sy opstanding te ondervind en deel te hê aan sy lyding deur aan Hom gelyk te word in sy dood,”

Hy sê hierdie woorde natuurlik as iemand wat Christus reeds geken en ontmoet het. Dis ‘n beskrywing van sy ideaal as Christen, dis sy lewensmoto. Vriend kan jy sê - “om te lewe is vir my Christus?” Ken jy Hom as Verlosser of spartel jy nog in die duisternis? Is dit jou ideaal om vir Hom te leef of leef jy net vir jou selfsugtige materialistiese belange? Wat is jou eerlike antwoord? Vandag is miskien ’n baie gepaste tyd om hieroor te dink? 

Onthou - net as jy kan sê “om te lewe is vir my Christus” sal jy ook in die aangesig van die dood kan sê “om te sterwe is vir my wins.”

AMEN

*Sien 2 Timoteus 4:6-8 “Wat my betref, ek word alreeds as drankoffer uitgegiet. Die tyd van my dood is voor die deur. Ek het die goeie wedloop afgelê; ek het die wenstreep bereik; ek het gelowig end-uit volgehou. Nou wag die oorwinnaarskroon vir my, die lewe by God. Op die dag dat Hy weer kom, sal die Here, die regverdige Regter, dit vir my gee, en nie net vir my nie, maar ook vir almal wat met verlange uitsien na sy koms.”

En verder - beleef jy tans depressie, ongemak of selfs vrees en paniek oor die dinge wat jy rondom jou sien? Kliek op DIE HEERLIKE ONSIGBARE WERKLIKHEID!

Saterdag 09 Oktober 2021

RUS IN VREDE!

 


Die vrede en rus wat God ons gee in Jesus is 'n wonderlike troos ook as ons by die graf van 'n geliefde staan. Dis egter 'n boodskap wat ook so maklik vals en hol kan klink...

Kliek op RUS IN VREDE

Woensdag 18 Augustus 2021

JESUS SKENK LEWE!

[Ons kry vastigheid en ware troos alleenlik uit God se Woord op 'n hartseer dag soos hierdie.]

Johannes 5:25-29

Ons vind hier ‘n groot TROOS, maar ook ‘n ernstige WAARSKUWING!

Dit hang saam met die twee groot feite wat hier na vore kom : 1. Jesus gee lewe.
2. Jesus sal eendag oordeel.

Altwee hierdie aspekte is in die Johannes evangelie ‘n duidelike bewys van die Godheid van Jesus! Jesus is God wat mens geword het. Vlees… (vleis!) Jesus stel Homself gelyk aan God die Vader. 

Vers 21 -  Soos die Vader die dooies opwek en lewend maak, so maak die Seun ook lewend wie Hy wil.

Vers 22 -   Self veroordeel die Vader niemand nie, maar die oordeel het Hy geheel en al aan die Seun oorgelaat.

Jesus skenk lewe. Dit word in hierdie deel in ‘n dubbele sin gebruik.

NOU en EENDAG met die wederkoms.

NOU – "Ek verseker julle: Daar kom ‘n tyd, en dit is nou, wanneer die dooies die stem van die Seun van God sal hoor, en dié wat daaraan gehoor gee, sal lewe." (25)   Wie is hierdie dooies? Dis mense wat nou leef, wat springlewendig is, maar geestelik dood is. As jy van God afgesny is, is jy dood. (soos ‘n tak wat van 'n boom afgebreek is) Dood in jou sonde… dood in jou ongehoorsaamheid, hoerery, diefstal, dronkenskap, rebelsheid, in jou beloftes wat jy voor God verbreek het.… noem maar op. Hier onder ons kan sulkes  wees… Hoe word sulke mense lewendig? 

Jy word geestelik lewendig as jy die stem van Jesus hoor en reageer! 

Sy stem wat jou uitnooi… "Kom na my toe almal wat uitgeput en oorlaai en Ek sal jou rus gee…” Sy stem wat verklaar :”Ek is die weg, die waarheid en die lewe.” Sy stem wat belowe : “Elkeen wat die Vader my gee sal na my toe kom en Ek sal die een wat na My toe kom nooit uitwerp nie." Sy stem wat aan die kruis uitroep : "Dis volbring!"  

Saamgevat - Sy stem wat gehoor word as die kruisevangelie verkondig word en ons oproep tot geloof en bekering! Jesus skenk lewe, ja die ewige lewe wanneer ons sy woorde hoor en met geloof en bekering daarop reageer. Johannes maak dit baie duidelik dat hierdie ewige lewe iets is waaraan ons NOU reeds deel kry. Hierdie ewige lewe kan nooit deur die dood uitgewis word nie. Daarom glo ons as iemand aan Jesus behoort en hy/sy sterf is daardie persoon dadelik by Jesus. Sy lewe saam met Jesus wat die kind van God nou reeds op aarde ervaar, gaan net ongehinderd aan. Ons sien Hom nou net van aangesig tot aangesig. Heerlik. Dis hoekom Paulus nie bang was vir die dood nie- hy noem die dood ‘n WINS!*

Ek wil vir jou vra : het jy al Jesus se stem gehoor en die ewige lewe as geskenk ontvang?

EENDAG – "Moenie hieroor verbaas wees nie: daar kom ‘n tyd wanneer almal wat in die grafte is, sy stem sal hoor en sal uitgaan. Dié wat goed gedoen het, sal opstaan en lewe, en dié wat verkeerd gedoen het, sal opstaan en veroordeel word." (28,29)  Hier verwys dit na die wederkoms. Almal sal opstaan. Ons sal opstaan met nuwe liggame. God se kinders bely dit mos elke Sondag saam. Ek glo in...



Dan gaan mense in twee groepe gedeel word. Vir sommige sal dit wees die opstandig tot die lewe… ‘n lewe met ‘n nuwe liggaam (sonder brille en pille, sonder siektes en skete, sonder sonde) in die nuwe skepping – ‘n nuwe hemel en ‘n nuwe aarde!

Vir ander sal dit wees ‘n opstanding tot veroordeling.

Wat gaan die kriterium vir die onderskeid wees? Hoekom gaan sommiges die lewe tegemoet en ander die veroordeling? Die klem hier is op dade. Die wat goed gedoen het en die wat verkeerd gedoen het. (29) Hoe nou? Word ons deur dade gered? Johannes is in sy evangelie baie duidelik dat ons deur geloof in Jesus gered word. Maar ware geloof maak dat jou dade anders gaan begin lyk. Ware geloof in Jesus lei tot ‘n heilige lewe… dit maak dat mens God se opdragte in Sy Woord begin gehoorsaam, dat mens ‘n nuwe lewe volgens God se standaarde en nie Hollywood en Huisgenoot standaarde begin lei nie. Ware geloof lei tot nuwe begeertes en nuwe passies byv. ‘n honger na God se Woord, ‘n verlange om saam met ander kinders van God Hom te aanbid en te prys! 

Wat van ons? Is ek en jy besig om goed te doen of is ons besig om verkeerd te doen? Mag ons gewaarsku wees - dade tel. Hoor wat sê Jesus oor die oordeelsdag : “Dan sal Ek openlik vir hulle sê: Ek het julle nooit geken nie. Gaan weg van My af, julle wat die wet van God oortree." (Matteus 7:23)

Openbaring bevestig dit ook - dit gaan oor dade!




Glo jy in Jesus? Maak ons geloof 'n verskil aan ons dade?

Kom ons kry die troos in Jesus se woorde – maar kom ons maak ook erns met sy waarskuwing! AMEN

*Filippense 1:21 "want om te lewe, is vir my Christus, en om te sterwe, is vir my wins."

Vrydag 28 Mei 2021

Jesus is nie meer in sy graf nie!

 Dis waarom ons 'n heerlike vaste hoop mag hê by die dood van 'n geliefde wat in Jesus gesterf het! Die hoop op die opstanding van die liggaam en die vooruitsig van 'n nuwe hemel en nuwe aarde!

Kliek op OPSTANDINGSHOOP vir 'n volledige boodskap op YouTube.



Vrydag 07 Mei 2021

EK GLO IN DIE OPSTANDING...

 As God se kinders kan ons maar nugter en realisties wees. Wat is die  ware feite rondom hartseer, lyding en dood?  Het ons nog steeds rede tot vreugde? Is daar hoop as ons by 'n sterfbed of graf staan?


Kliek op OPSTANDINGSVREUGDE vir 'n klankboodskap.




Woensdag 05 Mei 2021

'n GELUKKIGE DOOIE!

Skriflesing : Openbaring 14:9-13  (Klem op vers 13)

[Hierdie is 'n opsomming van die preek wat gelewer is by die troosdiens van ons geliefde suster Linda van Wyk wat ons gemeente jare lank met oorgawe bedien het as orreliste. Ons weet haar goeie werke volg haar...]

Sterf is ‘n hartseer saak. Ons weet dit, ervaar dit ook nou weer… En tog word hier gepraat van ‘n "gelukkige" sterf. Gelukkige dooies. En ons moet dit baie ernstig opneem. En as ons dit ernstig opneem en kinderlik God se Woord glo, sal dit vir ons heerlike troos bring op hierdie dag.

Daar is net twee soorte sterwe – om in die Here te sterf of in jou sonde te sterf. Alle dooies sterf nie in die Here nie. (vgl. Johannes 8:24) Jesus maak hierdie geweldige uitspraak teenoor die ongelowige Jode:  “Daarom het Ek vir julle gesê dat julle in julle sondes sal sterf; want as julle nie glo dat Ek Is nie, sal julle in julle sondes sterf.”  'n Groot kontras. In die Here. Of in sonde.

Wie is hierdie gelukkige dooies? Die konteks hier handeloor die oordele van God wat gaan kom. Spesifiek oor diegene wat die dier en sy beeld aanbid. (Dis nie nou die tyd om oor hierdie omstrede saak uit te brei nie.) Kortliks net dit - Dis nie mense wat ‘n inenting of "mikrochip" ontvang het nie. Dis mense wat in kompromie met die sondige wêreld sisteem leef.* Hulle dink (merk op die kop) en doen (merk op die hand) soos die sondige wêreld. Dis hulle wat volgens die wêreld se modes en waardes geleef het en nie volgens God se koninkrykswaardes nie.

Om in die Here te sterwe is die teenoorgestelde van om die merk van die dier te hê. Dis om die merk van God te hê. Dit beteken hier spesifiek om enduit in die geloof te volhard en getrou te bly aan Jesus.  Die Gees word ook spesifiek genoem hier. As iemand in Christus en in die Gees geleef het, sterf hy ook in die Goddelike atmosfeer van Christus en die Gees.

RUS

Waarom is diegene wat in die Here sterf so gelukkig? Hulle gaan die Goddelike rus binne. Rus is 'n heerlike tema van die begin van die Skrif en dwarsdeur. Dink aan  die rus wat God al beleef het na die skepping. Volmaakte vrede, harmonie en vervulling. Dis die rus waarvan die Sabbat ‘n skaduwee was. Dis die rus waarna Jesus mense uitnooi – Matteus 11:28. "Kom na My toe, almal wat uitgeput en oorlaai is en ek sal julle rus gee..."  (Jy kan dit nou reeds begin ontvang en nou hierin leef – dis die rus van vergifnis, kindskap, vrede met God...) Die volmaakte rus kom egter nog. Hebreërs 4:9,10 verwys na hierdie rus - "Daar wag dus nog steeds ‘n Sabbatsrus vir die volk van God, want elkeen wat in die rus van God ingaan, rus van sy werk, net soos God van Syne." Hierdie rus gaan sonder versteuring en sonder belemmering tot in alle ewigheid geniet word deur diegene wat IN die Here sterf. Daar gaan geen sonde, geen Satan en geen verganklikheid wees nie. Die trane sal van ons oë afgevee word. Hierdie rus van die dooies wat in die Here gesterf het, staan sterk in kontras met diegene (met die merk van die dier) wat dag en nag geen rus sal hê nie. (vers 11)

WERKE/DADE

God se kinders gaan spesifiek rus van hulle geswoeg (arbeid - OAV). Geswoeg – dis die gelowiges se opoffering en swaarkry ter wille van Jesus Christus.  God gee erkenning aan ons werke wat in Christus tot die eer van God gedoen is. Ons werke is belangrik! Hulle werke/dade volg hulle! Ja, ons dade op aarde het ewige gevolge – hier positief gestel!

Spesifiek ons dade wat ons aan medegelowiges gedoen het.  Luister bietjie : "Want God is nie onregverdig om julle werk te vergeet nie en die liefde-arbeid wat julle betoon het vir sy Naam, omdat julle die heiliges gedien het en nog dien."

Mag hierdie afskeidsgeleentheid weer vir ons elkeen die belangrikheid van ons dade (nie net ons geloof nie) onderstreep. Hierdie belangrikheid van ons dade word deur die apostel Paulus pragtig onderstreep -  “Maar, of ons hier woon of daar woon, ons het net een wens, en dit is om te lewe soos Hy dit wil. Ons moet immers almal voor die regterstoel van Christus verskyn, sodat elkeen kan ontvang volgens wat hy tydens sy aardse lewe gedoen het, of dit nou goed was of kwaad.” (2 Kor. 5:9, 10)

Ons dade tel tot in alle ewigheid! Petrus druk dit op ons hart. Leef versigtig in ontsag vir God! Luister -  "En as julle Hom as Vader aanroep wat sonder aanneming van die persoon oordeel volgens elkeen se werk, wandel dan in vrees gedurende die tyd van julle vreemdelingskap;" (1 Petrus 1:17)

Ons is hartseer – dis te verstane. Maar van ons geliefde broer/suster ...... sê God se Woord – Gelukkig is sy/hy . Inderdaad is sy/hy gelukkig – oor hom/haar hoef ons nie bekommerd te wees nie. 

DIE VRAAG

Die vraag is egter : As ek en jy vandag of more moet sterf, gaan ons ook gelukkig geag word? Gaan ons ook in die Here sterf? Gaan ons onder die gelukkige dooies getel word? Wel, jou dade sal dit nou reeds wys... WAT WYS JOU DADE? Het jy 'n egte geloof in Jesus wat sigbaar is in jou dade?


*Vir meer hieroor , kliek op MERK van die DIER.

Woensdag 28 Oktober 2020

VERHUISING : VAN TENT NA VASTE WOONPLEK

 Ons lees  2 Korintiërs 4:16- 5:1-10


Almal van ons ken ‘n tent. Almal van ons ken ‘n vaste geboude huis. ‘n Tent is baie lekker op sy tyd en plek, soos met ‘n vakansie. Maar as permanente woning is ‘n vaste geboude huis darem verreweg die beste. Paulus vergelyk ons aardse bestaan met ‘n tent. Ons ewige nuwe 
heerlike hemelse  bestaan vergelyk hy met ‘n vaste gebou. 

"Want ons weet dat as ons aardse tentwoning afgebreek word, ons 'n gebou het van God, 'n huis nie met hande gemaak nie, ewig, in die hemele." ( 2 Korintiërs 5:1)

Hy is baie eerlik en realisties. Ons aardse bestaan gaan afgebreek word. Dis tydelik. Ons ewige hemelse bestaan is ‘n vaste gebou van God en sal vir ewig bestaan. In die taal van Openbaring – daar sal geen siekte, smart, trane of dood meer wees nie. Ons gaan nuwe LIGGAME kry!

Die vaste gebou wat wag vir God se kind is baie beter as die tent waarin ons ons nou bevind! Dis ‘n basiese leerstelling van ons geloof.

Maar Paulus is baie eerlik as hy oor die dood praat. Dit lyk asof hy hier wil sê dat  hy (en ons seker ook!) sal verkies om tot by die wederkoms te lewe en dan onmiddellik nuwe liggame te kry. Sonder om ‘n tyd na ons dood deur te gaan wanneer ons nie liggame het nie. Ja, kom ons wees baie eerlik - die dood bly iets vreemds en as ons sou kon kies sou ons eerder direk na God wou gaan sonder om eers deur die dood “ontklee” te word.

Maar Paulus se doel in hierdie en die voorafgaande hoofstuk is om God se kinders moed in te praat.  (16) Ons vergaan, maar word dag tot dag vernuwe. Dis waar van elke kind van God. 

Ons kyk nie net na ons huidige omstandighede nie, maar na die onsigbare werklikheid. En dis die hoop op die vaste woonplek. 

En die basis vir die hoop op ‘n beter toekoms is die feit dat die Heilige Gees nou reeds in God se kinders woon. Die feit dat die Heilige Gees in ons woon is ‘n WAARBORG dat God hierdie liggaam nie sal afskryf of sal vergeet nie, maar sal opwek by die wederkoms! Dis die waarborg dat almal wat nou voor die wederkoms sterf in Jesus, sowel as diegene wat op die dag van die wederkoms nog leef, nuwe verheerlikte liggame sal kry!

Maar wat nou belangrik is – ongeag of ons gaan sterf en of ons nog by die wederkoms gaan leef, is om ‘n lewe te leef soos wat God wil hê! En dis ‘n dringende belangrike saak, want ook Christene gaan voor die regterstoel van Christus verskyn.  

"Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad." (2 Korintiërs 5:10)

LW – ons ALMAL. Ja, ons word gered deur geloof sonder werke, sonder prestasies – NET GENADE!, maar die Skrif is baie duidelik dat ook kinders van God se dade gaan beoordeel word. Die lewe van geloof onthef ons nie van ‘n lewe van gehoorsaamheid nie! Wat ons nou doen is baie belangrik! Leef jy vir God of leef jy net vir jouself? Is jy besig met die werk wat God jou gegee het in die gemeente waarin jy God jou geplaas het. En terloops – elke kind van God het ‘n gemeente – Hy voeg mense wat gered is by ‘n gemeente. En ELKE kind van God het ‘n taak op aarde – om God lief te hê en jou naaste soos jouself – dis die basis, maar dit kristalliseer in spesifieke take binne die gemeente as liggaam van Christus!

Die hoofboodskap van hierdie gedeelte is dat daar hoop is vir die Christen, hetsy of ons nou by die wederkoms lewe of reeds dood is. Maar hierdie hoop moet ons nie passief maak nie, hierdie hoop moet ons juis aanmoedig om NOU ‘n lewe te leef wat eer aan God bring, want ons gaan verantwoording doen. 


Hierdie boodskap kom dus nou na ons in die vorm van twee vrae: Is jy ‘n kind van God wat ‘n toekoms het na die graf?  Leef jy op so ‘n manier dat jy sal kan verskyn voor Jesus dat jou dade as Christen getoets kan word?

 

Saterdag 20 Junie 2020

LUKAS NEL


[Oom Lukas Nel van Tsumeb was 'n veteraan uit die Tweede Wêreld Oorlog en het ook 'n groot rol in die bosoorlog in die noorde van die destydse Suidwes gespeel. 1922-2020]



Niemand van ons kan op ‘n hartseer dag soos hierdie goeie nuus uitdink of opmaak nie... Want alle goeie stories wat ons kan saamslaan (al is dit wonderlike kleurryke verhale) is nie goed genoeg om die sleg en die hartseer uit te kanselleer nie! Maar... daar is wel een GOEIE NUUS wat sterker is as die slegte nuus van die dood, naamlik die EVANGELIE. Dis wat ek graag met julle almal wat hier is wil deel.

Paulus vat die evangelie vir ons baie duidelik, kort en kragtig saam in 1 Korintiërs 15:1-4 

“Ek herinner julle, broers, aan die evangelie wat ek aan julle verkondig het en wat julle ontvang het en waarin julle ook gevestig staan. 

Deur dié evangelie word julle ook gered as julle vashou aan die boodskap soos ek dit aan julle verkondig het. As julle aan iets anders vashou, het julle tevergeefs tot geloof gekom. 

Die belangrikste wat ek aan julle oorgelewer het en wat ek ook ontvang het, is dit: Christus het vir ons sondes gesterf, volgens die Skrifte; 

Hy is begrawe en op die derde dag opgewek, volgens die Skrifte.” 

Daar is veral twee redes hoekom hierdie GOEIE NUUS inderdaad goeie nuus is vir ons as mense. Dit spreek ons twee groot probleme of krisisse aan. Die twee groot monsters waarmee ons te doen het is : ons sonde en ons verganklikheid. (die feit dat ons almal sterflik is) Hierdie twee monsters is ‘n tweeling, hulle gaan altyd saam! 

SONDE. Die Bybel sê ons is almal sondaars wat ver van God is. Dis die Goddelike waarheid of ons nou daarvan hou of nie. Die implikasie is, ons kan nie soos ons is in God se teenwoordigheid kom nie, die hemel is vir ons geslote, ons sonde maak ‘n skeiding en ‘n muur tussen ons en God. “Die arm van die Here is nie te kort om te help nie en sy oor is nie te doof om te hoor nie. Dit is julle oortredinge wat skeiding gebring het tussen julle en julle God, dit is julle sondes wat maak dat Hy Hom nie aan julle steur nie en nie na julle wil luister nie.” (Jesaja 59:1,2) Maar die evangelie behels nou juis dat God ‘n oplossing vir hierdie probleem voorsien het. Jesus het die volle straf gedra. Hy het die pak gevat, die boete betaal sodat ons vry kan wees. Dis ook in Jesaja waar ons reeds hierdie goeie nuus verneem. “Oor óns oortredings is hy deurboor, oor óns sondes is hy verbrysel; die straf wat vir ons vrede moes bring, was op hom, deur sy wonde het daar vir ons genesing gekom.” (Jesaja 53:5) Hoe kry ons dit? Deur geloof en bekering. Om doelbewus en persoonlik die genade in Jesus te aanvaar. 

VERGANKLIKHEID. Ons ander groot probleem is ons verganklikheid Die Bybel leer dat ons lewens kort is, dat ons maar soos gras is. Dis die harde werklikheid. Almal van ons is sterwend, of die dood nou skielik kom soos met ‘n hartaanval of ongeluk en of dit nou stadig kom soos deur geleidelike aftakeling van die ouderdom... of ‘n kleuter sterf en of ‘n honderdjarige sterf die dood dit kom beslis! Vir elkeen van ons is daar ‘n vaste afspraak op God se almanak. (ons ken net nie vooraf die datum nie) Dis nie vir ons lekker nie, ons hele wese kom in opstand teen die monster van die dood. Die Bybel praat van die laaste vyand. Maar ook vir hierdie probleem het God ‘n oplossing gebring. Deur Jesus se opstanding uit die dood, is de dood oorwin en kan God se gereinigde kinders uitsien na ‘n ewige heerlike bestaan met ‘n nuwe liggaam. (Dis terloops die groot tema wat Paulus hier in 1 Korintiërs 15 aanspreek en in detail verduidelik. En Paulus beskryf op triomfantelike wyse hoe die dood die onderspit gedelf het. Hy spot eintlik met die dood. “Dood, waar is jou oorwinning?”) Die feit van Jesus se oorwinning oor die dood is dié groot troos vir God se kinders. Dis hierdie troos wat gemaak het dat Paulus nie eers in ‘n Romeinse tronk bang geword en moed opgegee het nie. Hoor bietjie hoe hy hieroor praat... “God het ons gered en ons geroep om aan Hom toegewy te wees. Dit het Hy gedoen, nie op grond van ons dade nie, maar op grond van sy eie besluit en die genade wat Hy van ewigheid af in Christus Jesus aan ons geskenk het. Hierdie genade is nou aan ons geopenbaar deur die koms van ons Verlosser, Christus Jesus: Hy het die mag van die dood gebreek en deur die evangelie die onverganklike lewe aan die lig gebring. ( 1 Timoteus 1:9,10) 

God se GOEIE NUUS is waarlik goeie nuus! Dit kom na ons hier wat lewe, want ons moet dit aanvaar terwyl ons lewe. Wat van jou, glo jy dit? Glo jy dit regtig, het dit al ‘n sigbare verskil in jou lewe gemaak? 

Kom ek probeer prakties verduidelik wat beteken geloof en bekering. Gestel jy is brandarm en voer ‘n sukkelbestaan deur uitskot groente en vrugte langs die straat te verkoop. Jy oorleef maar net-net... elke dag is vol ellende en swaarkry. Eendag onverwags kom daar iemand met ‘n koevert in die hand... Hy is bly om jou te kry en sê hy het goeie nuus vir jou. Jy het ‘n spog wynplaas in die Boland geërf van ‘n oom wat jy nie eers geken het nie. “Hier, meneer is al die dokumente, jy moet net teken en dan afreis Kaap toe om als in besit te neem....” Jy kyk deur als, dit lyk eg...Nou staan jy voor ‘n keuse, gaan ek dit glo of nie? Wel, as jy dit glo, gaan jy daardie lamlendige groentestalletjie net so los en jou haas om die plaas in besit te neem.... As jy die EVANGELIE glo, die evangelie van die vergifnis van sondes en die oorwinning oor die dood, sal jy onmoontlik net soos gewoonlik met jou ou lewe kan aangaan... Jy gaan nuut word, nuut dink, jou lewe gaan verander... Jy sal nie kan aangaan met bitterheid, onvergewensgesindheid en gierigheid nie! 

Dis ‘n hartseer dag, maar ons het elkeen die voorreg om GOEIE NUUS te hoor... wat maak jy hiermee? Die aanvaarding van hierdie Goeie Nuus moet ons elkeen se prioriteit wees! Heel eerste. “Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee.” (Matteus 6:33)