SOOS ‘N HOND…

[Hierdie verhaal het blykbaar regtig gebeur. Dit sou plaasgevind het op die klein dorpie Eendekuil in die Swartland. Ek kan natuurlik nie persoonlik vir die waarheid daarvan instaan nie. Nietemin, die boodskap is duidelik en die tragiese aspek daarvan is iets wat mens eintlik dikwels beleef…] 

Die plaaslike leraar kry ‘n versoek om iemand te begrawe. Die oorledene was kerklik egter glad nie betrokke nie. ‘n Gesprek met die lidmaat wat kom vra het vir die kerklike begrafnis vind toe plaas. 

Leraar : Sê my, het die oorledene gebid terwyl hy geleef het? 

Lidmaat : Nee, hy het nooit gebid nie. 

Leraar : Goed dan bid ons ook nie by sy begrafnis nie. Het hy darem Bybel gelees? 

Lidmaat : Nee, hy het nooit Bybel gelees nie. 

Leraar : Nou goed, dan sal ons maar ook nie Bybel lees by die begrafnis nie! En sê my, het hy darem gehou daarvan om saam met die gemeente te sing? 

Lidmaat : Nee, hy het nooit saam met die gemeente kom sing nie. 

Leraar : Ek verstaan. Nou ja dan gaan ons ook maar nie sing by sy begrafnis nie! Laat ek net seker maak, het hy hoegenaamd sy voete in die kerk gesit? 

Lidmaat : Nee, hy het nooit kerk toe gekom nie. 

Leraar : Reg, as hy dan soos ‘n hond geleef het, begrawe hom dan soos ‘n hond… 

Die volgende Sondag was daar nie plek vir ‘n muis in die kerk nie. Die plek was oorvol, die mense het selfs by die vensters ingehang… 

[Natuurlik, sal hierdie taktiek nie meer vandag werk nie. Die bygeloof dat ‘n Christelike begrafnis vir jou toegang tot God se koninkryk sal gee ten spyte van ‘n lewe sonder God en sy kerk, sal moeilik uitsterf, veral omdat afvallige lidmate gerieflik met ‘n buurgemeente reël om hulle te begrawe.]

DEEL VAN GOD SE NUWE SKEPPPING

Die dood ruk mens altyd tot stilstand om weer oor ‘n paar basiese vrae na te dink. Die dood van ‘n geliefde is altyd hartseer, maar dis ook weer ‘n geleentheid om ‘n slag voorraadopname te maak en jouself ‘n paar vrae te vra: Waarvandaan kom ons? Waar is ons nou? En waarheen is ons op pad? Gelukkig hoef ons nie oor die antwoorde te raai nie, die Woord gee baie helder antwoorde en insigte. 

2 Korintiërs 5:17 gee baie belangrike inligting, waarheid en troos! Die sleutelwoorde is “in Christus” en “nuwe skepsel”* 

“Daarom, as iemand in Christus is, is hy 'n nuwe skepsel; die ou dinge het verbygegaan, kyk, dit het alles nuut geword.” 

WAARVANDAAN? Ons almal se verlede begin by die paradys. God se skepping. God wat die mens na sy beeld maak en aanstel oor die res van sy skepping. Met sy beeld bedoel ons dat ons ‘n verstand gekry het om God te ken, ‘n hart om Hom lief te hê en ‘n wil om Hom te gehoorsaam. Nou weet ons almal wat het verder gebeur… die beeld is geskend. 

Sedert die val in die tuin van Eden is ons verstand verdorwe en verdof, ons ken God nie en wil Hom nie eens ken nie! 

Ons hart is boos en ongevoelig, daar is geen liefde en respek vir God nie, en daarom ook nie vir ons medemens nie. Ons wil is ook aangetas, sodat ons God en sy gebooie nie meer wil gehoorsaam nie. Elkeen doen mos wat reg is in sy eie oë! Dis hierdie toestand wat elkeen van ons raak of ons dit nou wil erken of nie. Iets moet met hierdie verlede en hierdie slegte erfenis gemaak word, anders het ons moeilikheid. Met hierdie verlede mis ons ons doel as skepsele nou hier op aarde, met hierdie verlede loop ons die gevaar om vir ewig verlore te gaan… 

WAAR IS ONS NOU? Dis ‘n vraag wat elkeen persoonlik moet antwoord. Die antwoord hang af wat jy met Jesus Christus gemaak het? As jy Hom aanvaar het is jy ‘n nuwe skepsel! ‘n Nuwe mens (met ‘n nuwe verstand, hart en wil), inderdaad ‘n nuwe skepping! Hoe werk dit? Jesus is die ware beeld van God. Hy ken sy Vader volkome, Hy het sy Vader volkome lief, Hy is volkome gehoorsaam aan die wil van Sy Vader! In die eerste Adam en in alle mense na Hom is die beeld van God versteur, maar Jesus is die Tweede Adam. Wie in Hom is, aan Hom behoort, is ‘n nuwe skepping in wie die beeld van God herstel is en besig is om herstel te word. Is jy al nuutgemaak? Vertoon jy die beeld van God? Is jy nog in Adam of is jy in Christus? Iemand het gesê : Voor God is net daar eintlik net twee mense : Adam of Christus en alle ander mense hang aan hulle gordels! Aan wie hang jy? 

WAARHEEN IS ONS OP PAD? Die begrip nuwe skepping gee ‘n belangrike leidraad. Die term nuwe skepping gaan oor meer as net persoonlike vergifnis en verlossing vir die mens wat deur geloof en bekering deel gekry het aan Jesus. 

As iemand in Christus is, is hy reeds deel van die nuwe skepping as geheel. Dis die toekomstige bedeling van ‘n nuwe hemel en ‘n nuwe aarde! 

Die Satan het groot verwoesting aangerig in God se skepping. In die mens, maar ook die natuur. Vanweë die sonde is die aarde vervloek. God het egter nooit sy skepping prysgegee of laat vaar nie. Sy bedoeling is die herstel van die hele skepping! Deur Jesus het God reeds begin met ‘n herskepping wat finaal sal uitloop op ‘n nuwe hemel en aarde. Ons lees in 2 Petrus 3:13 soos volg : “Maar ons leef in die verwagting van ‘n nuwe hemel en ‘n nuwe aarde wat God belowe het en waar die wil van God sal heers.” Dis alreeds deur die profeet Jesaja voorspel. In Jesaja 65:17 lees ons : “Ek gaan ‘n nuwe hemel en ‘n nuwe aarde skep; aan dié wat daar nou is, sal daar nie meer gedink word nie, hulle sal nie onthou word nie.” Hierdie herskepping vind nou reeds plaas in elke mens wat aan Jesus behoort maar sal voltooi word by die finale opstanding wanneer ons as mense met nuwe verheerlikte liggame op die nuwe aarde sal woon! ( Ons bely mos : “Ek glo in die opstanding van die vlees!”) 

Almal wat in Christus behoort is deel van God se nuwe skepping en kan nou reeds uitsien na die ewige heerlikheid. Verheerlikte mense met verheerlikte liggame op ‘n volmaakte aarde sonder sonde en stryd en trane en dood! 

Net weereens wat van nou? Is ons lewens nou vol sin en betekenis of moet ons net wag vir die eendag? Almal wat aan Christus behoort leef nou reeds as nuwe mense terwyl ons nog onvolmaak en in ‘n onvolmaakte wêreld is. Ons leef dus nie net met die oog op eendag nie. Wat ons nou doen is belangrik. Juis omdat ons glo in die opstanding wanneer ons verheerlikte volmaakte liggame sal kry moet ons nou voluit werk aan dit wat die Here ons gegee het om te doen. Paulus sluit sy heerlike hoofstuk oor die opstanding af met hierdie aanmoediging. “Daarom, liewe broers, wees standvastig, onwankelbaar, altyd oorvloedig in die werk van die Here, omdat julle weet dat julle inspanning in diens van die Here nie tevergeefs is nie.” (1 Korintiërs 15:58) 

As nuwe skepsele moet ons werk doen wat by die nuwe skepping pas, nou reeds! 

Ons verstaan nie altyd hoe dit wat ons doen inpas by God se ewige plan nie, maar ons moet ywerig en geduldig volhard… Die teoloog NT Wright gebruik die pragtige voorbeeld van werkers in ‘n steengroef. Hulle swoeg en sweet van die klippe kap. Dag na dag...Dis meestal ongeletterde mense wat nie verstaan waarom en hoekom nie. Hulle het nie altyd begrip van die groter prentjie nie. Hulle weet nie van die pragtige en imposante kasteel of katedraal wat hulle werkgewer in gedagte het nie! Tot op die dag wanneer die gekapte klippe in plek geplaas word en daar tot hulle verbasing ‘n meesterbouwerk verrys onder die bekwame hand van die boumeester... Elke kind van God, wat herstel is na God se beeld is besig met God se werk... Moenie moeg word en ophou nie! Jou werk is nie tevergeefs nie! AMEN!

* Die Griekse woorde ktisis kan ook vertaal word met skepping/creation.

JESUS SE OPSTANDINGSHEERLIKHEID

Is ons troos, maar rig ook ‘n vraag aan elkeen… 

"Toe sê Jesus vir haar: "Ek is die opstanding en die lewe. Wie in My glo, sal lewe, al sterwe hy ook; en elkeen wat lewe en in My glo, sal in alle ewigheid nooit sterwe nie. Glo jy dit?" Johannes 11:25-26 

Die dood is soos ‘n swart kol op die wit papier van ons bestaan. Ons kan dit nie uitvee of wegwens nie. Dis die groot verskrikking, skeiding en smart. Dis onvermydelik, daar is geen menslike oplossing of kuur nie. 

En tog.... Jesus in sy heerlikheid het wel ‘n antwoord vir die dood. Die klimaks van Jesus se heerlikheid is juis Sy opstandingsheerlikheid! Hy het die groot vyand van die dood verslaan. Hier in Johannes 11 lees ons hoe hy Lasarus uit die dood opgewek het, maar meer nog Hyself is die opstanding en die lewe. Daar bestaan nie lewe en opstanding buite Hom nie. Hy het later self uit die graf opgestaan en vir altyd die donker kettings van die dood afgeskud! En so vir al sy kinders ‘n nuwe heerlike bestaan geopen! Die Heilige Gees gee deur die Woord sekerheid in ons harte dat Jesus waarlik opgestaan het! 

Die opstanding is die fondasie waarop ons geloof rus! Vir die eerste dissipels was die opstanding van Jesus die klimaks wonderwerk, die “gamechanger”...Onthou hulle het met hulle eie oë gesien Jesus sterf... 

Almal het geweet Jesus was dood; van die goewerneur tot die soldate wat Hom tereggestel het tot die vroue wat Hom begrawe het tot sy teenstanders wat ’n sameswering rondom ’n opstandings gerug gevrees het. Hulle het almal geweet Hy was dood. Geen twyfel daaroor nie. Dit is waarom die storie wat opgedis is om die leë graf te verklaar, nie beweer het dat Hy nie regtig dood was nie, maar dat sy dissipels die liggaam gesteel het. Maar hierdie plan het nie gewerk nie. Die dissipels was so oortuig van die opstanding dat hulle bereid was om hulle lewens daarvoor te verloor (Mense sal eerder lieg om hulle lewens te beskerm, nooit om hulle lewens te verloor nie!) Hulle het dus duidelik geweet hulle het nie die lyk gesteel nie!

Hoe het hulle oortuig geword? Vir veertig dae het Jesus aan enkelinge sowel as groepe verskyn, sommige so groot as 500. (1 Korintiërs 15:6) Die meeste van hierdie persone was nie liggelowig nie, maar taai om oortuig te word. Soos Thomas... Die evangelies is baie eerlik... Toe die skeptiese dissipels begin besef dat die opstanding dalk waar sou kon wees, het hulle eers gespekuleer dat die Jesus wat hulle gesien het dalk ’n spook was. Jesus het korte mette met hierdie spekulasie gemaak en dit konkreet uit die weg geruim. So het Hy vir die twyfelende Tomas gesê : “Bring jou vinger hier en kyk na My hande; en bring jou hand en steek hom in My sy.” By ’n ander geleentheid het Jesus voor die verbaasde dissipels daarop aangedring om ’n stuk vis te eet om aan hulle te wys dat Hy nie ’n gees was nie. (Lukas 24:39-43) Geen twyfel oor die leë graf en die opstanding nie! 

Jesus se liggaam was beslis nie meer in die graf nie, want dan sou die vyand maar slegs Jesus se oorskot te voorskyn moes bring om die hele Christelike beweging stop te sit. Die graf was leeg. Jesus het liggaamlik opgestaan. (Nie net in mense se harte soos dikwels beweer word nie) Jesus se opstandingsliggaam was egter meer as net ’n sterflike liggaam wat weer lewendig geword het. Dit was dieselfde en tog ook nie dieselfde nie. Hy kon herken word, as die een wat Hy altyd was. Sy liggaam was ’n fisiese liggaam. Maar dit was ook ’n getransformeerde verheerlikte liggaam. Wanneer die apostel Paulus die toekomstige opstandingsliggaam van Christene beskryf, geld dit ook vir Jesus se liggaam, omdat Christus opgewek is as die “eersteling” van die res van die dooies wat aan Hom behoort. (1 Korintiërs 15:20) Met ander woorde die liggaam van die opgestane Christus is deel van dieselfde oes van al die ander liggame wat Hy sal opwek in heerlikheid op die laaste dag. Christus. Ons kry ‘n belangrike leidraad in Filippense 3:21. “Deur die krag waarmee Hy alles aan Homself onderwerp, sal Hy ons nederige liggame verander om soos sy verheerlikte liggaam te wees.” Dis dieselfde en tog op ’n heerlike manier baie beter. ‘n Liggaam sonder enige beperkings! 

Die opstanding van Jesus bevry ons van vrees en gee vir ons hoop en blydskap. Dis ook die troos wat ons het by die afskeid van ‘n geliefde wat aan Jesus behoort! Onthou Jesus self is die opstanding en die lewe, buite Hom is daar geen opstanding en geen lewe nie! Het jy al die opgestane Jesus vertrou as jou Verlosser? As Jesus hier vir Marta vra : “Glo jy dit?”, dan vra Hy nie net of sy glo dat Hy Lasarus uit die dood kan opwek nie, Hy vra haar :”Glo jy in My as die Enigste Een wat ewige lewe en volkome nuutmaking gee?” Hierdie selfde vraag kom vandag ook nou na jou...

ROUDIENS IN DIE FEESTYD

“Die maagd sal swanger word en ‘n Seun in die wêreld bring, en hulle sal Hom Immanuel noem." Die naam beteken God by ons.” (Matteus 1:23)

Ons is normaalweg baie opgewonde oor ‘n geboorte of ‘n bruilof hier in die feestyd. Dit pas mos goed in by die vreugde van Kersfees. Maar wat nou van sterftes? Hoe pas dood en hartseer in by die betekenis van Kersfees, by die viering van Jesus se menswording? Juis baie goed. Kom ek verduidelik...

Juis want Jesus is IMMANUEL. God BY ons! Hy is God by ons, in alle fasette en in alle omstandighede, nou en tot in ewigheid! By ons in ons stryd, sonde, hartseer en dood.

Jesus is God by ons, juis om ons te bevry van ons groot vyande en verskrikkinge. Wie of wat is hierdie vyande? 

Sonde, Satan, dood en hel! 

Hy moes ware mens word, mens van vlees en bloed sodat Hy deur sy dood ons van hierdie vyande kon bevry! Hy is volle mens, met ‘n liggaam onderworpe aan hongerkry, swaarkry, lyding en uiteindelik aan die dood. Hy het net nie sonde gehad nie, MAAR God het juis ons sonde op Hom gelaai en Hom as ‘n sondaar veroordeel tot die kruisdood in ons plek sodat ons bevryding en lewe kon ontvang.

Ons lees hierdie dramatiese waarheid duidelik in die Skrif : “Christus was sonder sonde, maar God het Hom in ons plek as sondaar behandel sodat ons, deur ons eenheid met Christus, deur God vrygespreek kan wees.” (2 Korintiërs 5:21)

Hoe bevry Jesus, Immanuel ons nou van sonde, satan, dood en hel?

Hy sterf vir ons sonde. Dis waarom Hy mens kom word het, om te kon sterwe. Hy vat aan die kruis ons sonde straf op Hom. Ja, God "behandel" Hom as sondaar deur hom te straf! En ons gaan vry. Hy kry die straf, naamlik die dood en ons kry die lewe. Natuurlik net vir die wat waarlik in Hom glo en hulle volle vertrou op Hom plaas.

Toe Jesus met ons sonde probleem afgereken het, val die ander vyande outomaties een na die ander soos in ‘n domino effek.

As Hy ons sondeskuld wegneem, verloor die Satan sy houvas op ons. Kyk, die duiwel pers ons af met ons sonde. Hy weet ons is skuldig. Hy maak ons daarmee bang. “God, gaan julle straf! Die ewige oordeel wag vir julle!” Maar nou dat Jesus die straf gedra het, is daar mos vir die kind van God geen straf meer oor nie! Die Satan kan ons dus nie meer bang maak nie. Ons het ‘n kragtige argument. "Ja, ek is skuldig, ek is ‘n sondaar, ek erken dit, maar daar was ‘n kruis! Immanuel, het my straf gevat... Van watter sondes wil jy nou praat, Satan?”

As die Satan se afdreiging en afpersing hulle effek verloor, verloor die dood ook sy verskrikking. Mense vrees die dood juis mos omdat hulle weet hulle moet voor God verskyn. Hebreërs 2:14,15 stel dit so duidelik en vat eintlik die betekenis en doel van Kersfees (Jesus se menswording) so mooi saam: “Aangesien hierdie kinders mense van vlees en bloed is, het Hy ook net soos hulle mens geword. Dit het Hy gedoen om deur sy dood dié een wat mag het oor die dood, dit is die duiwel, te vernietig en om hulle wat uit vrees vir die dood hulle hele lewe lank in slawerny was, te bevry.” Jesus se dood bring vir God se kinders bevryding van die slawerny van vrees! Dis die groot doel van sy vleeswording!

Omdat Jesus ons straf gedra het en elke kind van God se straf ten volle voltrek is aan die kruis, hou die hel ook vanselfsprekend nie meer vir ons ‘n verskrikking in nie.

Immanuel is by ons, in ons smarte en hartseer, Hy verstaan ons. Ook vir julle wat vandag van 'n geliefde afskeid neem... Maar baie meer, Hy het as Middelaar tussen God en mens ons bevry van sonde, Satan, dood en hel. Dis die hoop van die Kersboodskap, dis ons hoop op ‘n dag soos hierdie. Daarom kan die kind van God bly wees, altyd, al is dit ook met 'n traan in die oog...

En nou vriende is dit my voorreg, maar ook my Goddelike plig om te vra : Ken jy Immanuel, glo jy in Hom, vertrou jy Hom en wys jou lewe dit? Net Hy het 'n antwoord vir die verskrikking van die dood!

Om meer te verstaan van IMMANUEL, kliek op IMMANUEL.